BABILONIAX medopersa jaqinakampi katuntatäkäna ukapachatxa pä maraw saraqxäna. ¡Kunas akan kamachaski! Jïsa, Babiloniatwa sarxasipki. Janirakis katuntatäxapxitixä. ¿Khitis khitxäna?

Persia apnaqiri Ciro tataw khitxäna. Janïr Ciro sat tatax utjkäna ukhaw Jehová Diosax Isaiasampi Ciro tuqit akham qillqayäna: ‘Kuntï nayax munkä ukwa jumax luräta. Uka marka katuntañamatakixa punkunakas jistʼaratäskaniwa’ sasa. Jïsa, Ciro sat tataw Babilonia katuntäna. Uka markan punkunakapax chiqapuniw jistʼarataskänxa uknamwa arumax medopersa jaqinakax mantapxäna.

Ukampisa Jehová Diosan profetapax akham sarakïnwa: Jerusalenasa Diosan utapasa wasitampi saytʼayatäpan saniwa Ciro sat apnaqirixa, sasa. ¿Ciro sat apnaqirix ukhamti säna? Jïsa. Akham sasaw israelitanakar säna: ‘Jehová Diosaman utapa luriri Jerusalén markar sarapxam’ sasa. Uk luririw israelitanakax sarapxäna.

Ukampis janiw Babiloniat taqinix sarirjamäpkänti, kunattix Jerusalenkamax wali jayächïnxaya. Israelitanakax 800 kilometros ukha jaya sarapxañapänwa, ukat yaqhipanakax usutäpxänwa chuymanïxapxänwa ukatwa jan sarirjamäpkänti. Jan saririnakarux akham sänwa Ciro sat apnaqirixa: ‘Jerusalenan Diosan utap utachiri saririnakarux qullqimpi, qurimpi, ukat kunanakampsa churawayapxam’ sasa.

Ukatwa Jerusalenar kuttʼxir israelitanakax walja waxtʼäwinak katuqapxäna. Ukatxa, Jerusalén tʼunjasa Diosan utapat Nabucodonosorax vasonak apankäna ukanakampwa Ciro tatax churawayarakïna. Ukhamasti kunayman aptʼasitaw israelitanakax sarxapxäna.

Pusi phaxsitwa Jerusalenar purintapxäna. Horasaruw puripxäna kunattix Jerusalén markax tukjatäkan ukat puripxañapkamaxa 70 maraw pasxäna, uka maranakansti janiw kuna jaqis jakkänti uka markanxa. Markapar purxasasa jan waltʼäwinakanwa israelitanakax uñjasipxäna, uk yatxataskakiñäni.