Stori 80: Ol Man Blong God Oli Aot Long Babilon
KLOSAP tu yia i pas finis, stat long taem we ol man Media mo ol man Pesia oli winim Babilon. !Traem luk wanem i stap hapen naoia! Yes, ol man Isrel oli stap goaot long Babilon. ?Olsem wanem oli kamfri? ?Hu i letem olgeta oli gofri?
Sirus, we i king blong Pesia, hem nao i letem olgeta oli gofri. Longtaem bifo we Sirus i bon, Jeova i givim tok long Aesea long saed blong Sirus se: ‘Sirus. Yu bambae yu mekem olsem we mi mi wantem. Doa blong bigfala stonwol blong taon ya, bambae i open i stap nomo, bambae yu go insaed mo winim taon ya.’ Mo i tru, Sirus nao i lidim ol ami blong oli go winim Babilon. Ol ami blong Media mo Pesia oli kam insaed long taon ya long naet, oli pastru long ol doa blong bigfala stonwol we oli open i stap nomo.
Aesea, profet blong Jeova, i bin talem tu se Sirus bambae i givim oda blong oli wokem bakegen Jerusalem mo haos blong God. ?Olsem wanem? ?Sirus i givim oda ya? Yes. Hem i talem long ol man Isrel se: ‘Yufala i mas gobak long Jerusalem, yufala i mas stanemap bakegen haos blong God blong yufala, Jeova.’ Mo hemia nao samting we ol man Isrel ya oli stap go blong mekem.
Be i no olgeta man Isrel evriwan we oli naf blong mekem longfala trip ya i gobak long Jerusalem. Rod ya i longfala tumas, samwe long 800 kilometa. Mo plante long olgeta oli olfala tumas mo oli sik. I gat sam narafala samting tu we i blokem samfala blong oli no gobak. Olgeta we oli no save gobak, Sirus i talem long olgeta se: ‘Yufala i mas givim silva mo gol mo ol narafala presen long olgeta we oli go blong bildim bakegen Jerusalem mo haos blong God.’
Ale, ol man oli givim plante samting long ol man Isrel we oli stap gobak long Jerusalem. Mo tu, Sirus i givimbak ol besin mo ol kap we King Nebukadnesa i bin karemaot long haos blong Jeova taem hem i spolem Jerusalem. Ol man ya oli karem plante samting i gobak wetem olgeta.
Ol man Isrel oli wokbaot klosap fo manis, nao oli kamtru long Jerusalem long stret taem we Jeova i makem. Hemia 70 yia stret, stat long taem we ol ami oli bin spolem Jerusalem, mo ol man oli aot long ples ya. Be, nating se ol man Isrel oli kasem ples blong olgeta bakegen, oli fesem hadtaem yet, olsem yumi luk long nekis stori.
Aesea 44:28; 45:1-4; Esra 1:1-11.
Ol Kwestin
- ?Long pija ya, ol man Isrel oli stap mekem wanem?
- ?Olsem wanem Sirus i mekem profet tok we Jeova i givim long Aesea i kamtru?
- ?Sirus i talem wanem long ol man Isrel we oli no naf blong mekem trip ya blong gobak long Jerusalem?
- ?Sirus i givim wanem long ol man Isrel blong oli karem i gobak long Jerusalem?
- ?Ol man Isrel oli wokbaot hamas manis blong kasem Jerusalem?
- ?Hamas yia i pas finis stat long taem ya we ol man Isrel oli aot long kantri blong olgeta?
Sam narafala kwestin
- Ridim Aesea 44:28 mo 45:1-4.
?Olsem wanem Jeova i soem se profet tok ya long saed blong Sirus i sua blong kamtru? (Aes. 55:10, 11; Rom 4:17)
?Profet tok blong Aesea long saed blong Sirus i soemaot wanem samting long saed blong fasin blong Jeova God blong talemaot fiuja? (Aes. 42:9; 45:21; 46:10, 11; 2 Pita 1:20)
- Ridim Esra 1:1-11.
?Folem fasin blong olgeta we oli no naf blong gobak long Jerusalem, olsem wanem yumi save “givhan long olgeta” we oli naf blong paenia? (Esra 1:4, 6; Rom 12:13; Kol. 4:12)
