Maana 80nan

Ala ka jamakulu bɔra Babilonɛ

A BƐ san fila bɔ sisan ko Babilonɛ minɛna Medekaw ni Persekaw fɛ. E k’a lajɛ ko min bɛ ka kɛ sisan. Israɛlkaw bɛ ka bɔ Babilonɛ. U hɔrɔnyara cogo di? Jɔni de y’a fɔ u ye ko u ka taa?

Perse masakɛ Sirus de y’a fɔ u ye ko u ka taa. Waati jan sani Sirus ka wolo, Jehova y’a fɔ kira Esayi ye ko a ka nin kumaw sɛbɛn ka ɲɛsin Sirus ma: ‘Ne b’a fɛ i ka min kɛ, i bɛna a kɛ ten tigitigi. Dugu dondaw yɛlɛlen bɛna to i ɲɛ walisa i ka dugu minɛ.’ A kɛra ten. Sirus de ye Babilonɛ minɛni ɲɛminɛ. Medikaw ni Persekaw donna sufɛ Babilonɛ kɔnɔ, dugu dondaw fɛ, minnu yɛlɛlen tora.

Nka, Jehova ka kira Esayi y’a fɔ fana ko Sirus tun bɛna ci fɔ ko Jerusalɛm ni a ka Alabatoso ka jɔ kokura. Yala Sirus ye o ci fɔ tiɲɛ na wa? Ɔwɔ. Sirus y’a fɔ Israɛlkaw ye ko: ‘Aw ye taa Jerusalɛm, ka aw ka Ala Jehova batoso jɔ.’ Israɛlkaw bɛ ka o de kɛ tigitigi. U bɛ sira kan ka taa Jerusalɛm.

Nka, Israɛlka minnu tun bɛ Babilɔnɛ, olu bɛɛ ma se ka segin Jerusalɛm. Sira tun ka jan kosɛbɛ. A tun bɛ taa kilomɛtɛrɛ 800 ɲɔgɔn na. U caman tun kɔrɔla kosɛbɛ. U caman fana tun tɛ kɛnɛbagatɔw ye ka se ka o taama jan sugu  kɛ. Nka, kun wɛrɛw y’a to mɔgɔ dɔw ma taa. Sirus y’a fɔ o mɔgɔw ye minnu ma taa, ko: ‘Aw ka warijɛ ni sanu ni nilifɛn wɛrɛw di mɔgɔw ma minnu bɛ taa ka Jerusalɛm ni a ka Alabatoso jɔ.’

O la sa, fɛn caman dira o Israɛlkaw ma minnu tun bɛ ka taa Jerusalɛm. Nka, o dɔrɔn tun tɛ. Nebukadnezar tun ye jifilen ni tasa minnu ta Jehova batoso kɔnɔ Jerusalɛm cituma na, masakɛ Sirus ye olu fana di u ma. O kosɔn, fɛn camanba tun bɛ o Israɛlkaw bolo, u tun ka kan ka segin ni minnu ye Jerusalɛm.

Kalo naani ɲɔgɔn kɔfɛ, Israɛlkaw sera Jerusalɛm ka bɛn waati kofɔlen ma. Jerusalɛm dugu cira ka jamana lankolonya pewu nin y’a san 70 de ye tigitigi. Hali mɔgɔ kelen tun t’a kɔnɔ. Nka, hali ni Israɛlkaw seginna u faso la sisan, u tun bɛna waati gɛlɛn dɔw dɔn i ko an bɛna o ye cogo min na kɔfɛ.

Esayi 44:28; 45:​1-4; Esdrasi 1:​1-11.