DUL-AN sa duha ka tuig ang milabay sukad ang Babilonya nabihag pinaagi sa mga Medianhon ug mga Persianhon. Ug tan-awa unsay nahitabo karon! Oo, ang mga Israelita nagbiya sa Babilonya. Kinsa ang nagpalakaw kanila?

Si Ciro, ang hari sa Persia, ang nagpalakaw. Dugay na una pa si Ciro matawo, si Jehova nagsugo sa iyang manalagnang Isaias nga mosulat mahitungod kaniya: ‘Ikaw magabuhat sa unsay akong gustong ipabuhat kanimo. Ang mga ganghaan biyaang bukas alang kanimo aron maagaw ang siyudad.’ Ug si Ciro nangulo sa pag-agaw sa Babilonya. Ang iyang kasundalohan misulod sa siyudad sa gabii pinaagi sa ganghaan nga pinasagdang bukas.

Apan ang manalagna ni Jehova nga si Isaias miingon usab nga si Ciro mohatag sa sugo alang sa Jerusalem ug sa templo niini nga tukoron pag-usab. Si Ciro ba mihatag ning sugoa? Oo, siya mihatag. Ug kana ang hinungdan ang mga Israelita nangadto sa pagtukod niini.

Apan dili tanang mga Israelita sa Babilonya ang makahimo ning taas panaw balik sa Jerusalem. Daghan ang tigulang na o masakiton nga dili makalahutay sa 500 milyas (800 kilometros) nga gilay-ong panawon. Busa si Ciro miingon niadtong dili moadto: ‘Ihatag ang salapi ug bulawan ug ubang mga gasa sa katawhan kinsa mobalik sa pagtukod sa Jerusalem ug sa templo niini.’

Busa daghang mga gasa gihatag ngadto sa mga Israelita kinsa paingon sa Jerusalem. Usab, si Ciro naghatag kanila sa mga panaksan ug mga kopa nga gikuha ni Haring Nabucodonosor gikan sa templo ni Jehova sa iyang paglaglag sa Jerusalem.

Human sa dul-an upat ka bulang pagpanaw, ang mga Israelita nahibalik sa Jerusalem sa hustong panahon. Kini maoy 70 ka tuig sukad ang siyudad gilaglag, ug ang yuta awaaw sa pumuluyo. Apan, bisan sila didto sa ilang kaugalingong yuta, anaa gihapon sa unahan ang pipila ka malisod nga panahon niining mga Israelita.