ISUA iba ama ekpere ndibe tọn̄ọ nte mbon Media ye Persia ẹkeda Babylon. Ndien se se itibede ke emi! Ih, nditọ Israel ke ẹkpọn̄ Babylon. Mmọ ẹkenam didie ẹbọhọ? Anie akayak mmọ ẹnyọn̄?

Cyʹrus, edidem Persia akayak. Anyan ini mbemiso Cyʹrus akamana, Jehovah ama anam Isaiah prọfet esie ewet aban̄a enye: ‘Afo eyenam kpasụk se nyomde fi anam. Mme itịm eyeberede ẹnọ fi ada obio.’ Ndien Cyʹrus ama ada iso ke ndida Babylon. Mbon Media ye Persia ẹma edidụk obio ke okoneyo ẹto mme itịm oro ẹkẹkpọn̄de in̄wan̄.

Edi Isaiah prọfet Jehovah n̄ko ama ọdọhọ ete ke Cyʹrus eyenọ ewụhọ ẹfiak ẹbọp Je­rusalem ye temple esie. Nte Cyʹrus ama ọnọ ewụhọ emi? Ih, enye ama ọnọ. Ntem ke Cyʹrus ọdọhọ nditọ Israel: ‘Eka Jerusalem ke emi, ẹnyụn̄ ẹbọp temple Jehovah, Abasi mbufo.’ Ndien emi ke nditọ Israel ẹka ndikanam.

Edi idịghe kpukpru nditọ Israel ke Babylon ẹkeme ndinam anyan isan̄ n̄ka Jerusa­lem. Edi ata anyan isan̄, n̄kpọ nte itiat 500 (kilometer 800) ndien ekese ẹsọn̄, mme ẹdọn̄ọ ẹkaha ndisan̄a oyom usụn̄ ntre. Ndien mme ntak efen ẹdu oro ndusụk owo mikaha. Edi Cyʹrus asian mmọ oro mikaha ete: ‘Ẹnọ mmọ oro ẹkade ndifiak mbọp Jerusalem ye temple esie silver ye gold ye mme enọ efen.’

Ntre ẹnọ nditọ Israel emi ẹkade Jerusalem ediwak enọ. N̄ko, Cyʹrus ọnọ mmọ mme usan ye mme cup oro Edidem Neb·u·chad·nezʹzar akadade ke temple Jehovah ke ini osobode Jerusalem. Mme owo ẹnyene ekese n̄kpọ ndibiom mfiak.

Ke ema ẹkenam isan̄ ke ọfiọn̄ inan̄, nditọ Israel ekesịm Je­rusalem ke nnennen ini. Edi kpasụk isua 70 tọn̄ọ nte ẹkẹsobo obio oro, ndien isọn̄ akana ukpọk ofụri ofụri anana owo. Edi okposụk nte nditọ Israel ẹfiakde ke idụt mmọ ke emi, mmọ ẹyenyene n̄kpọsọn̄ ini, nte nnyịn idifiọkde iban̄a.