Kukwe kira 80

Israel kä mikaninkä Babilonia

NITRE medo bätä persa käkwe Babilonia diani jai ye bitikäre kä nikanina bäsi kubu ta. ¡Aune dreta nemen bare mike ñärärä! Nitre Israel tä kä mikekä Babilonia yekänti. ¿Ñokänti namani kwäre? ¿Nirekwe juaninta?

Ciro rei Persia, käkwe nuainbare. Ciro jämi därere ye känenkri, Jehovakwe profeta Isaías mikani kukwe ne tike niara yebätä: ‘Ti tö dre nuainmana mäi erere mäkwe nuaindi. Jukwe ye tuainmetre tikani mäi ne kwe mäkwe juta ye diandre jai.’ Ye erere, Ciro käkwe ji ngwani käne Babilonia diankäre jai. Nitre medo bätä persa nikani deu juta yete jukwe tuanimetre tikani yete ta.

Akwa Ciro käkwe nitre juain Jerusalén bätä templo sribere bobukäre, ye Isaías profeta Jehovakwe käkwe niebare arato. ¿Rei Ciro käkwe ye erere nuainbare? Jän. Kukwe ne niebare kwe nitre Israel ie: ‘Mun rikata Jerusalén, aune yete munkwe templo Jehovakwe ye sribeta.’ Aune ye erere nitre Israel käkwe nuainbare.

Akwa nitre Israel nämene Babilonia ye jökrä ñaka nikani mente Jerusalén. Kä mente krubäte, ngraba 800 kilómetro näre, aune nitre Israel kwati namanina umbre bätä bren nänkäre mente. Akwa kukwe mada nämene arato. Nitre ñaka nikani ye ie Ciro käkwe niebare: ‘Nitre näinta Jerusalén ükete bätä templo sribere ye ie munkwe ngwian, oro bätä jondron mada bian.’

Yebätä, nitre Israel nikaninta Jerusalén ye ie jondron biani krubäte. Rei Nabucodonosor käkwe Jerusalén ganinte angwane jondron ngwä sribebare bätä baso nämene templo Jehovakwe yete dianinkä kwe, ye Ciro käkwe biani ietre arato. Nitre Israel nikani jondron ngwena ere jai.

Nitre Israel käkwe nänbare sö kräbokä, aune mrä kä kitani ye näre te namani Jerusalén. Juta ye ganinte bätä ni ñaka namanina nüne kä yekänti angwane, ye bitikäre kä nikani 70 täte ta. Nitre Israel namaninta ja käite, akwa ja tuani kukwe tare ben kwetre, ye nikwe mikai gare jai.

Isaías 44:28; 45:1-4; Esdras 1:1-11.