MEDE bona Parasa taudia ese Babulonia idia abia bona kahirakahira lagani rua idia ore vadaeni. Bona hari ia vara noho gauna mani oi itaia! Oibe, Israela taudia be Babulonia idia rakatania noho. Edena bamona unai gabu idia rakatania? Daika ese ia ruhadia?

Parasa edia king, Kurese, ese ia ruhadia. Kurese ia do vara lasi neganai, Iehova ese ena peroveta tauna Isaia ia hamaoroa ena sivarai ia torea: ‘Egu ura hegeregerena do oi karaia. Hanua oi abia totona, iduara be do idia kehoa noho.’ Bona momokani Kurese ese tuari taudia ia gunalaia Babulonia idia tuari henia bona idia abia totona. Mede bona Parasa taudia be hanuaboi ai idia kehoa noho geiti amo hanua lalonai idia vareai.

To Iehova ena peroveta tauna Isaia ia gwau danu, Kurese ese oda do ia henia Ierusalema bona ena dubu idia haginia lou totona. Kurese ese unai hahegani ia henia, a? Oibe, unai bamona ia karaia. Kurese ese Israela taudia ia hamaoroa: ‘Hari Ierusalema dekenai umui lao bona emui Dirava, Iehova, ena dubu umui haginia.’ Bona inai Israela taudia be unai totona idia lao noho.

To Babulonia dekenai idia noho Israela taudia ibounai be Ierusalema dekenai idia giroa lou lasi. Ia be laolao daudauna, kilomita 800 bamona bona momo be idia buruka eiava gorere idia lao totona. Bona ma badina haida dainai haida idia lao lasi. To Kurese ese idia lao lasi taudia ia hamaoroa: ‘Ierusalema bona ena dubu haginia totona idia lao taudia dekenai siliva, golo bona ma gau haida umui henia.’

Unai dainai, Ierusalema dekenai idia lao Israela taudia dekenai harihari gaudia momo idia henia. Danu, Nebukanesa ese Ierusalema ia hadikaia ore neganai, Iehova ena dubu amo ia abia disi bona kapusi be Kurese ese idia dekenai ia henia. Gau momo herea do idia huaia giroa.

Hua 4 bamona lalonai idia laolao murinai, Israela taudia be nega korikorina ai Ierusalema dekenai idia ginidae. Hanua idia hadikaia bena lagani 70 ia ore vadaeni, bona tano dekenai ta ia noho lasi. Ena be Israela taudia be hari edia tano dekenai idia noho, to hekwakwanai haida idia davaria, gabeai unai do ita dibaia.