VAKUVĨ myaka ĩlĩ nĩmĩvĩtu kuma yĩla Mbaviloni yakwatiwe nĩ Ametia na Avelisia. Na yu kwasisya kĩla kĩendee! Aisilaeli maendee na kuma Mbaviloni. Makwatie ũthasyo ata? Na nũũ wamaekie mathi?

Nĩ Kulusi, mũsumbĩ wa Velisia. Ĩvinda ĩasa mbee wa Kulusi kũsyawa, Yeova eeie mwathani wake Isaia nĩaandĩke ũũ ĩũlũ wa Kulusi: ‘We ũkeeka o ũndũ nyie nĩenda wĩke. Mĩomo ĩkatiwa yĩmĩvingũe nũndũ waku nĩ kana ũkwate ĩ ndũa.’ Kwoou Kulusi nĩwatongoisye nthĩnĩ wa kũkwata Mbaviloni. Ametia na Avilisia mesĩile mbingĩlonĩ syatiĩtwe syĩ mbingũe na malika ĩ ndũanĩ ũtukũ.

Ĩndĩ o na ĩngĩ mwathani wa Yeova Isaia aĩtye kana Kulusi akaumya mwĩao Yelusaleme na ĩkalũ syakwe ĩngĩ. Kulusi nĩwaumisye mwĩao ũsu? Ĩĩ, nĩwawumisye. Ũũ nĩw’o Kulusi weeie Aisilaeli: ‘Endai, yu, Yelusaleme na mũyaka ĩkalũ ya Yeova, Ngai wenyu.’ Na ũũ nĩw’o Aisilaeli aa maendete kwĩka.

Ĩndĩ ti Aisilaeli onthe ala maĩ Mbaviloni maĩ matonya kũthi kyalo kĩu kĩasa kya kũsyoka Yelusaleme. Kyaĩ kyalo kĩasa mũno vyũ kya kĩlomita 800. Aingĩ moo maĩ akũũ kana maĩ awau mũno ũndũ matatonya kũthi kyalo kĩasavĩte ũu. Na o kwĩ maũndũ angĩ ala matumie andũ amwe matathi. Kulusi ameie ũũ ala mataĩ matonya kũthi: ‘Manengei vetha na thaavu na mĩthĩnzĩo ya mĩthemba ĩngĩ andũ ala meũsyoka nĩ kana makake Yelusaleme na ĩkalũ yayo.’

Kwoou, Aisilaeli ala masyokete Yelusaleme manengwa mĩthĩnzĩo mingĩ. Na ĩngĩ, Kulusi amanenga mbakũli na ikombe ila Nevukatilesa woosete kuma ĩkalũnĩ ya Yeova yĩla waanangie kũu Yelusaleme. Andũ maĩ na syĩndũ mbingĩ mũno sya ũkua masyoke nasyo.

Ĩtina wa kũthi kyalo ta myei ĩna, Aisilaeli nimavikie Yelusaleme o ĩvinda yĩla yathanĩtwe. Nĩ myaka 70 ki kuma yĩla ndũa ya Yelusaleme yaanangiwe, na nthĩ yatiwa yĩ nthei vyũ, ĩte andũ. Ĩndĩ o na kau Aisilaeli maĩ manasyoka nthĩ yoo ene, mo nĩmakwatiwe nĩ mathĩna ĩngĩ, o tondũ tũũsyoka kwona.

Isaia 44:28; 45:1-4; Esala 1:1-11.