RĨU nĩ ta mĩaka ĩĩrĩ mĩhĩtũku kuuma Babuloni rĩatahwo nĩ Amedia na Aperisia. Ta kĩrore ũrĩa kũrekĩka rĩu! Ĩĩni, Aisiraeli nĩ kuuma maroima Babuloni. Mohorirwo atĩa? Nũũ wetĩkĩririe mathiĩ?

Nĩ Kurusu, mũthamaki wa Perisia. Mbere mũno o na Kurusu atarĩ mũciare, Jehova aatũmire mũnabii wake Isaia aandĩke ũũ: ‘Ũrĩĩkaga maũndũ mothe marĩa nyendaga mekwo. Na ihingo igakorũo ihingũrĩtwo mbere yaku nĩ getha ũtahe itũũra.’ Na nĩguoni, Kurusu nĩatongoririe gũtaha Babuloni. Amedia na Aperisia maatonyire itũũra-inĩ ũtukũ magereire ihingo-inĩ iria ciatigĩtwo itarĩ hinge.

Ningĩ Isaia mũnabii wa Jehova no oigĩte atĩ Kurusu nĩaangĩathanire atĩ Jerusalemu na hekarũ yarĩo rĩakwo rĩngĩ. Ĩĩ hihi-rĩ, Kurusu nĩaaheanire watho ũcio? Ĩĩni. Nĩkĩo gĩatũmire Kurusu eere Aisiraeli ũũ: ‘Ambatai rĩu, kũu Jerusalemu mũgaake hekarũ ya Jehova Ngai wanyu.’ Na rĩu nĩguo Aisiraeli aya manyitĩte njĩra merekeire gwaka.

No ti Aisiraeli othe arĩa maarĩ Babuloni mangĩahotire rũgendo rũu rũraya rwa gũcoka Jerusalemu. Nĩ rũgendo rũraihu mũno mũno, rwa kiromita ta 800 na aingĩ maarĩ akũrũ kana arũaru mũno matingĩahotire rũgendo rũu. Ningĩ kwarĩ na itũmi ingĩ ciagiririe andũ angĩ mathiĩ. Kurusu agĩkĩĩra arĩa matangĩahotire gũthiĩ ũũ: ‘Heanai indo cia betha na thahabu o na iheo ingĩ ineo andũ arĩa maracoka gwaka Jerusalemu hamwe na hekarũ.’

Nĩ ũndũ ũcio, iheo nyingĩ nĩcianeirũo Aisiraeli arĩa maacokire Jerusalemu. Ningĩ, Kurusu akĩneana mbakũri na ikombe iria Mũthamaki Nebukadinezaru aakuĩte kuuma hekarũ-inĩ ya Jehova rĩrĩa aanangire Jerusalemu. Andũ acio maacokire na indo nyingĩ mũno.

Thutha wa rũgendo rwa mĩeri ĩna-rĩ, Aisiraeli maakinyire Jerusalemu o ta ũrĩa kwarathĩtwo. Rĩu nĩ mĩaka 70 kuuma rĩrĩa itũũra rĩanangirũo, na bũrũri waatigĩtwo ũtarĩ na mũndũ o na ũmwe. O na gũtuĩka Aisiraeli nĩmaacokire bũrũri-inĩ wao-rĩ, maarĩ na mahinda maritũ mũno mbere yao, ta ũrĩa tũkuona thutha ũyũ.

Isaia 44:28; 45:1-4; Ezara 1:1-11.