PEPI myaka ibiji yapichilepo kufuma kimye Babilona kyo ashinjilwe ku bena Media ne bena Pelisha. Akimona kibena kumwekana papo! Ee, bena Isalela bafumine mu Babilona. Bafuminemo byepi? Ñanyi wibaswishishe kufumamo?

Mfumu wa bena Pelisha, aye Kilusa ye wibaswishishe. Kilusa saka akyangye kusemwa, Yehoba waambijile ngauzhi wanji Isaya kunemba pe Kilusa amba: ‘Ukoba bintu byonka byo nkeba’mba akobe. Bibelo bikashala bya kyashi kuba’mba ukashinde muzhi.’ Kilusa watangijijile nzhita mu kushinda Babilona. Bena Media ne bena Pelisha batwelele mu muzhi bufuku kupichila mu bibelo byashajile kyashi.

Kabiji ngauzhi wa Yehoba, aye Isaya waambile ne kuba’mba Kilusa ukapana mukambizho wa kushimukulula jibiji Yelusalema ne nzubo ya Lesa. Nanchi Kilusa kya kine wapaine uno mukambizho nyi? Ee, wapaine. Kilusa waambijile bena Isalela bino amba: ‘Yainga ku Yelusalema, mukashimukulule nzubo ya Yehoba, Lesa wenu.’ O ene mambo o wamwena bano bena Isalela kwimanya lwendo lwa kuya na kwingila uno mwingilo.

Bino kechi bena Isalela bonse mu Babilona bakonsheshe kwenda musinso walepele bingi kubwelamo ku Yelusalema ne. Luno lwendo lwalepele bingi, makilomita 800 kabiji bavula bakankelwe na mambo a kuba bakotele kabiji ne kukolwa bingi. Kabiji kwajinga ne bintutu bikwabo byalengejile bamo kushala. Bino Kilusa waambijile boba bashajile’mba: ‘Panai siliva ne ngolode kabiji ne bya bupe bikwabo ku bantu babena kubwela na kushimukulula Yelusalema ne nzubo ya Lesa.’

Onkao mambo, bya bupe byavula byapainwe ku bano bena Isalela bajinga pa lwendo lwa kubwela ku Yelusalema. Kabiji Kilusa wibapele michiba ne makapu o asendele Mfumu Nebukaneza kufuma mu nzubo ya Yehoba kimye kyo aonawine Yelusalema. Bantu bajinga na bintu byavula bingi bya kusenda pa kubwela kwabo.

Panyuma ya kwenda pa bañondo bana, bena Isalela bafikile mu Yelusalema pa kimye kyafwainwa. Kya kine, papichile myaka 70 kufuma kimye muzhi kyo aonawinwe, kabiji mu muzhi kechi mwashajilepo muntu nangwa umo waikelengamo ne. Bino nangwa kya kuba bena Isalela babwelele mu muzhi wabo, bapichilenga mu makatazho byonka byo tukafunda mu mutwe walondelapo.