Esimwititi 80: Muhoko gwaKarunga tagu tundu moBabironi
PANA piti nye nomvhura mbali kutunda apa Babironi va zi kwete Vamede noVaperesiya. Tara nye eyi yina kuhoroka ngesi! Yimo, Vaisraeli kuna kutunda moBabironi. Ngapi omu vana manguruka-manguruka? Yilye ogu ana va sigi va ze?
Age kuna kara Koresi, hompa gwaPeresiya. Siruwo sosire komeho Koresi va mu hampuruke, Jehova kwa ninkire muporofete gwendi Jesaya a tjange kumuhamena asi: ‘Ove ngo rugana eyi nina ku harere asi yiyo no rugana. Marungavero ngava ga ku sigira gana zeguruka yipo o kwate sitata.’ Ano Koresi ga pitisilire mokukwata Babironi. Vamede noVaperesiya kwa hwililire mositata kupitira pomarungavero aga va sigire ago gana zeguruka.
Nye muporofete gwaJehova, Jesaya, ga tente hena asi Koresi nga gava mpangera asi Jerusarema nontembeli zazo va zi tungurure. Koresi ga geve mpangera ezi ndi? Yimo, ga zi geve. Eyi yiyo ana kutantera Koresi Vaisraeli asi: ‘Zendeni koJerusarema mu ka tunge ntembeli zaJehova, Karunga gweni.’ Eyi ngesi yiyo nye vana kuzira Vaisraeli va ka rugane.
Nye kapisi Vaisraeli navenye womoBabironi va vhulire kuza morugendo oro rorure rokutengura koJerusarema. Aro rugendo rorure unene rokusika ponokirometa 800, ano wovanzi kwa kurupire ndi kwa verere unene, ano kapi tava vhuru kugenda sinano sosire ngoso. Pana kara hena nokonda dimwe edi vana pilire vamwe kuza. Nye Koresi ta tantere owo vana kupira kuza asi: ‘Peni vantu owo vana kutengura sisiliveli nongorodo ntani nomauhwi hena nagopeke va ka tunge Jerusarema nontembeli zazo.’
Makura mauhwi gomanzi tava ga pe Vaisraeli owo vana kutengura koJerusarema. Koresi ta va pe hena yipako nononkinda edi ga ka gusire hompa Nebukadenesara montembeli zaJehova apa ga ka zonagwire Jerusarema. Vantu kuna kara noyininke yoyinzi eyi vana simbi nawo.
Konyima zokugenda poyiha yomakwedi gane, Vaisraeli tava ya siki koJerusarema posiruwo sosiwa. Kwa pitire po tupu nomvhura 70 kutunda apa sitata va si zonagwire po, ano sirongo kwa kere sa hana vantu. Nye nampili ngomu Vaisraeli va tengwire kosirongo sawo, ngava ka kara hena nomaudigu, ngomu tuna ku ka lironga.
Jesaya 44:28; 45:1-4; Esira 1:1-11.
Mapuro
- Moomu vana yi fanekesa mefano, yinke vana kurugana Vaisraeli?
- Ngapi omu ga ya sikisire mo Koresi uporofete waJehova kupitira mwaJesaya?
- Yinke ana kutantera Koresi Vaisraeli wokudira kuvhura kutengura koJerusarema?
- Yinke ana kupa vantu Koresi va tengwide koJerusarema?
- Makwedi gangapi va gusa Vaisraeli mokutengura koJerusarema?
- Nomvhura dingapi dina piti po kutunda apa sirongo sina kara sa hana vantu?
Mapuro gokugwederera ko
- Resa Jesaya 44:28 ntani 45:1-4.
Ngapi omu ga nkondopeka Jehova usili wesikiliromo wouporofete kuhamena Koresi?
Uporofete waJesaya kombinga zaKoresi, yinke wa likida kuhamena unankondo waJehova Karunga mokupumba yokomeho?
- Resa Esira 1:1-11.
Pokukwama sihonena sowo va dilire kuvhura kutengura koJerusarema, ngapi omu naina natu vhura‘kukwafa’ owo wokuvhura kurugana yirugana yokukarerera?
