PABAPITE kubwipi myaka ibidi tamba Babiloni ukwatwa na Bene Mede ne Bene Peleshia. Tala mobyalongekela pano! Bine, Bene Isalela abatambe mu Babiloni. Abapebwa bwanapabo namani? Le webaleka bende i ani?

I Shilusa mulopwe wa Peleshia. Kumeso bininge Shilusa kabutwilwe, Yehova wātonwene Isaya mupolofeto asoneke myanda inenena pādi amba: ‘Ukalonga kyokya kyonsakile. Binjilo bikashitulwa mwanda wa akakwate kibundi.’ Bine Shilusa ye watangidila divita dya kukwata Babiloni. Bene Mede ne Bene Peleshia abatwela mu kibundi bufuku papo milango mishale mishitule.

Ino Isaya mupolofeto wa Yehova, wānene monka’mba Shilusa ukaleta musoñanya wa kūbakulula Yelusalema ne tempelo. Lelo Shilusa waleta uno musoñanya? Bine weuleta. Pano Shilusa wanena Bene Isalela’mba: ‘Endai mu Yelusalema, mukōbake tempelo ya Yehova Leza wenu.’ Ye ako kwenda Bene Isalela’ku.

Inoko ke Bene Isalela bonsopo badi mu Babiloni bakokeja kujokela mu Yelusalema. I lwendo lulampe lwa makilometele kubwipi kwa 800, bavule i banunu nansha babemvu. Kadi kudi buluji bukwabo kebwendelapo bantu bamobamo. Ino Shilusa wasapwila boba kebendapo amba: ‘Pānai ndalama ne nsahabu ku bantu benda kukōbaka Yelusalema ne tempelo.’

Penepo abape Bene Isalela benda mu Yelusalema byabuntu bivule. Shilusa nandi webape ngeso ne bitomeno byāselele Mulopwe Nebukaneza mu tempelo ya Yehova pawāonakenye Yelusalema. Bantu abaenda na bintu mulwi.

Kupwa kwa myeji kubwipi kwa iná ya lwendo, Bene Isalela abafika mu Yelusalema mu kitatyi kitungwe. Papo kepadi myaka 70 tamba kibundi kitūtwa, mu ntanda kemwadipo bantu. Inoko, nansha Bene Isalela abajokela mu ntanda yabo, basa kumona malwa amoamo, enka na motusa kumwena pa bilonda’ko’bi.