MPANJI 80

Antu jaNzambi Anafumi muBabiloni

KWAKWIHI nayaaka yiyedi yinahitihu dehi kufuma hatambwiluwu Babiloni kudi aMediya nawaPeresi. Dichi talaña chumanyi chinakumwekana hanu! Eña, aIsarela anakufuma muBabiloni. Alubukili ñahi? Hinyi wayilubwili?

Kirusi mwanta wakuPeresi diyi. Henohu Kirusi kanda yavwaliki, Yehova walejeli kaprofwetu kindi Isaya kusoneka hadi yena: ‘Wukela neyi chochinakeñi nami wili. Akakushila chinsu chawashi kulonda wukatambuli musumba.’ Nawa Kirusi diyi walombweli hakutambula Babiloni. A Mediya nawaPeresi eñilili mumusumba nawufuku kuhitila kuyinsu kwashiliwu kwawashi.

Ilaña kaprofwetu kaYehova Isaya wahosheli cheñi nindi Kirusi wakahana nshimbi yakutuñulula cheñi Yerusalema nitembeli yachu. Komana Kirusi waheni iyi nshimbi? Eña, waheni. Ichi dichayilejeliyi Kirusi aIsarela nindi: ‘Yenu dinu kuYerusalema mukatuñi tembeli yaYehova Nzambi yenu.’ Nawa ichi dichinakuyawu nakwilawu awaIsarela.

Ilaña bayi neyi aIsarela ejima adi muBabiloni akutwesha kwenda lwendu lwakufunta kuYerusalemaku. Hilwendu lwalulehi nankashi lwakushika kumakilomita 800 nawa amavulu anasweji kushinakaja hela kukata nankashi hakwila nawu endi njila yayilehi. Nawa kudi cheñi njila jikwawu jinakojeji antu amakwawu kubula kuya. Ilaña Kirusi hakuleja ana anakañanyi kuya nindi: ‘Hanenu wuru nisiliva niyawaana yikwawu kudi antu anakufunta nakutuña Yerusalema nitembeli yachu.’

Dichi anayinki yawaana yayivulu aIsarela anakufunta kuYerusalema. Kirusi hakuyinka cheñi jimbashila nimalupasa afumishiliyi Mwanta Nebukaneza mutembeli yaYehova hakisañeniyi Yerusalema. Antu akweti yuma yayivulu yakusenda hanakufuntawu.

Hanyima yakwenda hadi tukweji tuwana, aIsarela hiyakushika kuYerusalema hampinji yashikila. Munahiti dehi yaaka 70 kufuma hakisañeniwu musumba, nawa ituña adishili chakubula antu chikupu. Hela chakwila aIsarela anafunti kwituña dawu, akwikala nakukala neyi chitukudiza hambidi.

Isaya 44:28; 45:1-4; Ezera 1:1-11.