MEDIA leh Persia-miten Babulon an lak achin kum hnih a ral lek lek tawh a. Tunah enge thleng han en teh! A ni, Israel-miten Babulon an chhuahsan mek a ni. Engtinnge an chhuah? Tuinnge kaltir?

Persia lalber Kuran a kaltir a ni. Kura pian hma daihah a chanchin Jehovan a zawlnei Isaia a ziahtir a. ‘Ti tura ka duh che ngei chu i ti ang. Khawpui i lak nan kawngkate chu hawnsaa dah an ni ang,’ tiin. Babulon laknaah Kuran hma a hruai a. Media leh Persia-mite chu zanah kawngka hawn saah khawpui an lut ta a ni.

Mahse Jehova zawlnei Isaia chuan Jerusalem leh a biak in sa leh turin Kuran thu a pe ang a ti bawk a. Chu thupek chu Kuran a pe em? Aw, pe e. Kuran Israel-mite a hrilh chu hei hi a ni: ‘Tunah Jerusalem-ah kal ula, tin in Pathian Jehova biak in sa rawh u,’ tih hi. Chu ngei chu ti turin heng Israel-mite hi an kal mek a ni.

Mahse Babulon-a Israel mi zawng zawngin Jerusalem-a haw kawng hla tak chu an kal thei lo va. Zin kawng thui deuh mel 500 (kilometer 800) vel a ni a, tin tam tak chu chuti anga hla zin tur chuan an tar lutuk emaw an dam lo lutuk emaw a ni. Tin mi thenkhat kal lohna chhan dang pawh a awm. Mahse kal lote chu Kuran: ‘Jerusalem leh a biak in sa tura kalte hnenah tangkarua leh rangkachak leh thilpek dangte pe rawh u,’ tiin a hrilh a.

Tichuan, Jerusalem-a haw Israel-mite chu thilpek tam deuh pek an ni a. Kura chuan Lalber Nebukadnezzaran Jerusalem a tichhiat laia a lak thlengkumte leh note chu an hnenah a pe a. Mipuite chuan ken haw tur an ngah ngawt mai.

Thla li vel an thang hnuah, Israel-mite chuan a hun takah Jerusalem an thleng a. Khawpui tihchhiat a nih leh ram chu a ruak veka hnutchhiah a nih achin kum 70 chiah a ni. Israel-mite chu anmahni ramah an kir leh tawh na a, kan hriat leh tur angin hun harsa thenkhat an nei dawn.