NGA kʼia jeme jao nó tjínle nga kiskoe Babilonia je chjota medo kao chjota persa. ¡Kʼoa chótsenlalai jme xi kjima ndʼaibi! Jaon, je chjota israelita tjíobitjoni ya Babilonia. Jósʼin tsakationdaini. ʼYáni xi kitsjoaʼndele nga kitjo.

Jé Ciro, reyle Persia. Kʼianga kjesa tsinjin je Ciro, je Jeobá kʼoakitsole Isaías nga tongini katakji xi tʼatsʼe chjota jebi, kitso: “Kui kʼoasʼiain jmeni xi mena an nga sʼiain. Je xo̱ntjoa satíotixʼali nga chjoai je naxinandá”. Kʼoa je Ciro tsakándiale chjota kjoajchánle nga kitjoele Babilonia. Je chjota medo kao chjota persa nga jnjio jaʼasʼen ya Babilonia kʼianga títixʼa je xo̱ntjoa.

Tonga Isaías kʼoati kitso kʼianga kʼoene je Ciro nga katasʼendaya ijngokʼani Jerusalén kʼoa kao yo̱ngo̱le. A kitsjoa kjoatéxoma jebi je rey Ciro. Jaon. Kui jebi xi kitsole je chjota israelita: “Tangion ya Jerusalén, kʼoa tʼendao je yo̱ngo̱le Jeobá Nináno”. Kʼoa kui xi kisʼin je chjota israelita.

Tonga litsa to ngatsʼijin je chjota israelita xi ya tjío Babilonia nga kʼoakoanle nga ki Jerusalén. Nga nʼio kjin, me ño sá kʼoétsoma nga kuichó, kʼoa nʼio nkjín chjota israelita xi nʼio je koanjchínga kʼoa chʼin je tjínle nga koai. Kʼoa tjínsa anni nga tsín kini. Tonga je xi tsín ki, kitsole Ciro: “Tʼailao taonchxoa, taonsiné kʼoa xi kjaʼaisa tsojmi je xi tjíofikʼénda Jerusalén kʼoa kao yo̱ngo̱le”.

Kuinga, nʼio nkjín tsojmi tsakʼaisínile je chjota israelita xi ki ya Jerusalén. Je Ciro kʼoati kitsjoale je chxoa̱ kʼoa kao chotsín xi kiskoe rey Nabucodonosor ya yo̱ngo̱le Jeobá nga kichosíkje Jerusalén. Nʼio nkjín tsojmi kikao je chjota israelita.

Me ño sá kichoni je chjota israelita ya Jerusalén. Kʼoakjoan tjín nó kichoni jokitsole Jeobá, jankan kao te nó nga je kichonikje Jerusalén kʼoa nga tsín ʼya chjota ti kisʼeni. Ninga je kichó ijngokʼani ya naxinandále je chjota israelita, ñʼai tsakatio, josʼin jchaa xi fisani.