Zistwar 80

Pep Bondie Kit Babylone

PRESKE de-z-an finn pase depi ki bann Med ek bann Pers finn pran lavil Babylone. Ek gete ki pe arive asterla! Bann Izraelit pe kit Babylone. Kouma zot finn gagn zot liberte? Kisannla finn les zot ale?

Se Cyrus lerwa Pers. Bien avan ki Cyrus ne, Jéhovah ti fer So profet Isaïe ekrir lor li: ‘To pou fer zis seki mo anvi to fer. Pou kit bann laport lavil ouver pou ki to kapav pran li.’ Se Cyrus ki finn diriz larme pou pran Babylone. Bann dimounn ti kit laport lavil gran ouver sa swar ki bann Med ek bann Pers ti pran lavil la.

Me profet Jéhovah, Isaïe, ti osi dir ki Cyrus ti pou donn lord ki rekonstrir Jérusalem ek so tanp. Eski Cyrus ti donn sa komannman-la? Wi. Ala seki Cyrus dir bann Izraelit: ‘Asterla ale, al Jérusalem ek konstrir tanp Jéhovah, zot Bondie.’ Ek se samem ki bann Izraelit pe fer, zot pe ale.

Me pa tou bann Izraelit dan Babylone ki kapav fer sa long vwayaz-la pou retourn Jérusalem. Se enn vwayaz bien long, ki anviron 800 kilomet, ek boukou tro vie ouswa tro malad pou fer sa long vwayaz-la. Ek ena ankor lezot rezon kifer sertin parmi lepep pa kapav ale. Me Cyrus dir bann ki pa pe ale: ‘Donn bann dimounn ki pe retourn konstrir Jérusalem ek so tanp, larzan, lor ek bann lezot kado.’

Alor, bannla donn boukou kado bann Izraelit ki lor semin retour pou Jérusalem. Cyrus donn zot osi bann bol ek bann koup ki Lerwa Neboukadnetsar finn pran dan tanp Jéhovah kan li ti detrir Jérusalem. Lepep ti ena enn kantite kitsoz pou sarye avek zot.

Apre anviron kat mwa vwayaz, bann Izraelit retourn dan Jérusalem atan. Sa fer exakteman 70 an depi ki lavil inn detrir, ek pei ti abandone net. Me mem si bann Izraelit inn retourn dan zot prop pei zot pou pas par bann moman bien difisil. Anou gete ki arive apre sa.

Isaïe 44:28; 45:1-4; Ezra 1:1-11.