XA̱KÚYATIN u̱vi̱ ku̱i̱ya̱ ku̱a̱ʼa̱n tá sa̱ndíʼi-xa̱ʼa na̱ ñuu Media xíʼin na̱ ñuu Persia ñuu Babilonia. Koto ña̱ kúú vitin. Na̱ ñuu Israel kéena ñuu Babilonia. ¿Ndachun va̱ʼa ni̱nu̱nana vitin? ¿Ndáana ta̱váñaʼá ñuu Banilonia?

Ta̱ rey Ciro ta̱ ñuu Persia ta̱xi ke̱ena ku̱a̱ʼa̱nna. Tá kúma̱níka kaku ta̱ Ciro, Jehová ni̱ka̱ʼa̱nra xíʼin ta̱ profeta Isaías ña̱ ná kaʼyíra ña̱yóʼo xa̱ʼa ta̱ Ciro: ʼKeʼún ña̱ kúni̱i̱ keʼún. Kununá yéʼé ña̱ ñuu Babilonia ña̱ va̱ʼa ki̱ʼviúnʼ. Ta̱ Ciro kúú ta̱ ka̱nitáʼan xíʼin na̱ ñuu Babilonia. Na̱ ñuu Media xíʼin na̱ ñuu Persia ni̱ki̱ʼvina ñuu yóʼo saáchi ni̱nu̱na yéʼéña.

Ta̱ Isaías ta̱ kúú profeta nu̱ú Jehová, ni̱ka̱ʼa̱nra xa̱ʼatu ta̱ Ciro ña̱ kaʼndara chiñu ña̱ ná ku̱ʼu̱nna ñuu Jerusalén keʼé tukuna templo. ¿Á xa̱ʼnda ta̱ rey Ciro chiñu yóʼo? Xa̱ʼndavaraña. Ña̱yóʼo kúúña ni̱ka̱ʼa̱nra xíʼin na̱ ñuu Israel: ʼKuaʼándó chí ñuu Jerusalén, ta kán keʼéndó templo Jehová Ndióxi̱ndóʼ. Ta ña̱yóʼo kúú ña̱ ku̱a̱ʼa̱n na̱ ñuu Israel keʼéna.

Soo su̱ví ndiʼi na̱ ñuu Israel na̱ íyo ñuu Babilonia kivi ku̱ʼu̱n chí ñuu Jerusalén. Chi káni̱ní kúúña kúyatin ku̱mí yo̱o̱ kakana ku̱ʼu̱nna. Ku̱a̱ʼání na̱ ñuu Israel xa̱chéevana, kúúmiína kue̱ʼe̱va, savatuna íyoka inka xa̱ʼa ña̱ kǒo kívi ku̱ʼu̱nna. Soo na̱ kǒo kívi ku̱ʼu̱n ñuu Jerusalén ta̱ Ciro ni̱ka̱ʼa̱nra xíʼinna: ʼTaxindó plata xíʼin oro ndaʼa̱ na̱ ku̱ʼu̱n keʼé templo ñuu Jerusalénʼ.

Ña̱kán na̱ ñuu Israel na̱ ku̱a̱ʼa̱n chí Jerusalén ku̱a̱ʼání ña̱ʼa ku̱a̱ʼa̱n xíʼinna. Ta̱ Ciro ta̱xitura ko̱ʼo̱ kúnu ini xíʼin copa ndaʼa̱na ña̱ ta̱vá ta̱ rey Nabucodonosor ini templo Jehová tá sa̱ndíʼi-xa̱ʼara ñuu Jerusalén. Ku̱a̱ʼání ña̱ʼa ndíso na̱ ñuu yóʼo ku̱a̱ʼa̱nna.

Ni̱ya̱ʼa ku̱mí yo̱o̱ ni̱xi̱kana, saáví ni̱xa̱a̱na ñuu Jerusalén. Xa̱ni̱ya̱ʼa 70 ku̱i̱ya̱ tá ndi̱ʼi-xa̱ʼa ñuu yóʼo ta ni kǒo na̱ yiví ndóo nu̱úña. Ni ndi̱kóví na̱ ñuu Israel ñuuna. Saá koova tu̱ndóʼo nu̱úna. Vitin sakuaʼayó xa̱ʼa ña̱yóʼo.