MUA hiti miaka ivali fume ha va kupalela Mbambilone kuli vaMende na vaPelesia. Tala vika vili na ku lingika aha! Cili, vaIsaleli vali na ku tuhuka mu Mbambilone. Vati va na hasa ku patuka? Iya na va patula?

Silu muangana ua Pelesia ikeye na va patula. Ntsimbu tele Silu kanda aci semuka, Yehova ua lekele kapolofeto keni Isaya ku soneka vieni ngueni: ‘U ka linga ngue muze mu na i cizango cange. Va ka seza mapito a casi kaha linga u ka kovele na ku tuva mbonge’. Silu ikeye mpundu ua tuamanene masualale ku ka kuata Mbambilone. VaMende na vaPelesia va kovelele mu mbonge ku vutsiki ku hitila mu vimbelo vi va sile via casi.

Vunoni Isaya kapolofeto ka Yehova, ua handekele naua vikuavo ngueni Silu aka hana lisiko lia ku tungulula Yelusalema na tembele. Vuno Silu ua hele mpundu eli liseko ni? Eyo ua hele. Silu ua lekele vaIsaleli ngueni: ‘Hamenu vuovuno, mu ka tunge Yelusalema na tembele ya Yehova Njambi yenu’. Evi vikevio vi va ya mu ku linga ava vaIsaleli vali mu vungendzi vua ku hiluka.

Vunoni kati vose vaIsaleli va kele mu Mbambilone va hasele ku hiluka ku Yelusalema. Muomu vua puile vungendzi vua laha cikuma-kuma, ha kele vikilometro via ku pua 800, kaha vantu vamo va kulupile cikuma na ku zeya ngeci ka va hasele ku enda. Kaha kuli viuma vikuavo vi lingisa vantu ku hona ku ya. Vunoni Silu ua leka vaze ka va tondele ku ya ngueni: ‘Hienu palata na olu na vuana vukuavo kuli vaze vali na kuya mu ku tungulula tembele na Yelusalema’.

Ngeci va na hana vuana vua vuingi kuli vose vaIsaleli va li na ku hiluka ku Yelusalema. Kaha Silu ua va hele naua vingandza na malonga, vize via ambatele Muangana Nevukaneza mu tembele ya Yehova mua ka nongesele Yelusalema. Ngeci vantu va kele na viuma via vingi via kuambata.

Mu nima ya vungendzi vua vingonde viuana, vaIsaleli va ka hetele mua cili ku Yelusalema. Mua hiti miaka 70, fume ha va nongeselele mbonge, kaha cifuti ca salele ca mupulungua. Vunoni vutuhu vaIsaleli va na hiluka ku cifuti cavo, va ka mona visoti via kama, ngue mu tu ka mona mu cilongesa ci na hatako.