Tanojnots 80

Israelitas kiskej Babilonia

AJSITOYAYA ome xiuit ijkuak medos uan persas moaxkatilijkej Babilonia. ¡Uan xikita tein mochiujtok axkan! Kemaj, israelitas kistokej Babilonia. ¿Keniuj mokixtijkej? ¿Akoni kinkauak maj kisanij?

Kinkauak Ciro, tein tekiuajtia Persia. Miak xiujmej achtopa keman nemiskia Ciro, Jiova kichiuak maj itanauatijkauj Isaías kijkuilouani tein kichiuaskia: ‘Tikchiuas tein nej nikneki xikchiua. Kikauaskej maj tatapoto altepet uan ijkon uelis timoaxkatilis’. Uan Ciro kemaj taixyekanak keman moaxkatilijkej Babilonia. Medos uan persas kalakkej youak itech altepet kampa tatapotoya.

Sayoj ika Isaías, itanauatijkauj Jiova no kijtojka ika Ciro tanauatiskia maj kiyekachijchiuanij Jerusalén uan itemplo. ¿Kitemakak tekiuaj Ciro nejin tanauatil? Kemaj. Yejua nejin tein kiniluij israelitas: ‘Xiyakan Jerusalén, uan ompa xikchijchiuakan itemplo Jiova namoDios’. Uan yejua nejon yaya kichiuatij israelitas.

Sayoj ika amo nochin israelitas tein moajsiaj Babilonia ueliskiaj mokepaskiaj Jerusalén. Ta uejka katka, ¡tel uejka! Monekia nejnemiskej kemej naui metsti, uan miakej katkaj xiuejkejya uan mokokouayajya. Uan okseki tamanok kintsakuiltij maj amo yanij. Sayoj ika tein amo yaya mokepatij, Ciro kiniluij: ‘Xikinimakakan plata uan oro uan okseki netetayokolilmej tein mokepatij uan kichijchiuatij Jerusalén uan templo’.

Yejika, israelitas tein mokepkej Jerusalén kiselijkej miak netetayokolilmej. Uan Ciro no kinimakak tatayilonimej tein tekiuaj Nabucodonosor kinkixtijka itech itemplo Jiova keman kixpolojkej Jerusalén. Tel miak taman kiuikakej israelitas.

Satepan keman israelitas ojtokakej kemej naui metsti, ajsikej Jerusalén ijkon kemej moijtojka. Panokaya ajsitok 70 xiujmej ijkuak Jerusalén kiixpolojkaj uan mokaujka taseltijkan. Sayoj ika maski israelitas moajsiajya imin talpan, kipanokej ouijkayomej, kemej tikitaskej.

Isaías 44:28; 45:1-4; Esdras 1:1-11.