EHOKOLOLO 80
Oshigwana shaKalunga Tashi Thigi po Babilon
KONYALA oomvula mbali dha piti po okuza sho Babilon a yugwa ko kAamedia nokAapersia. Ngashingeyi tala shoka tashi ningwa po! Eeno, Aaisrael otaa thigi po Babilon. Ongiini yo ya mangululwa mo? Olye e ya pitika ya ye?
OKores, omukwaniilwa gwaPersia. Nale manga Kores inaa valwa, Jehova okwa nyolitha omuprofeti gwe Jesaja kombinga ye: ‘Ngoye oto ka longa naanaa shoka nda hokwa. Omiyelo otadhi ka thigwa inaadhi edhilwa opo ngoye u vule u yuge ko oshilando.’ Kores noye ngoka a li ta wilike pethimbo lyeyugoko lyaBabilon. Aamedia nAapersia oya yi moshilando uusiku ya pitile momiyelo ndhoka dha thigwa inaadhi edhilwa.
Ihe omuprofeti gwaJehova Jesaja okwa ti wo kutya Kores ota ka gandja elombwelo kutya Jerusalem notempeli yasho yi tungululwe. Kores mbela elombwelo ndika okwe li gandja ngaa? Eeno, okwe li gandja. Osho shika Kores ta lombwele Aaisrael: ‘Indeni ngashingeyi kuJerusalem nomu tunge otempeli yaJehova Kalunga keni.’ Nosho naanaa shoka Aaisrael mbaka ye li mondjila oku ka ninga.
Aaisrael ayehe mboka ye li muBabilon inaa vula okukutha olweendo olule okushuna kuJerusalem. Olwo olweendo oluleeleka, konyala lwookilometa 800, noyendji oya kulupa noonkondo nenge taye ehama unene nokuya molweendo olule ngawo. Nopu na omatompelo gamwe molwashike yamwe itaaya yi. Ihe Kores ota ti kwaamboka itaaya yi: ‘Gandjeni oshisiliveli noshingoli nomagano galwe kaantu mboka taa shuna oku ka tungulula Jerusalem notempeli yasho.’
Ano Aaisrael mbaka ye li mondjila okushuna kuJerusalem otaa pewa omagano ogendji. Kores ota gandja wo kuyo iiyaha nomakopi ngoka Omukwaniilwa Nebukadnesar a kuthile motempeli yaJehova sho ye a hanagula po Jerusalem. Aantu oye na iinima oyindji okuhumbata pokushuna kwawo.
Konima yolweendo lwoomwedhi ne lwaampono, Aaisrael otaa thiki muJerusalem pethimbo lela. Osha li naanaa oomvula 70 okuza ethimbo ndyoka oshilando sha hanagulwa po, noshilongo osha li sha thigwa po shaa na aantu. Nonando ngashingeyi Aaisrael oya galukila koshilongo shawo, opu na omathimbo omadhigu ge li komeho, ngaashi tatu ke shi mona ngashingeyi.
Jesaja 44:28; 45:1-4; Esra 1:1-11.
