Kgaolo 80: Setšhaba sa Modimo se Tloga Babilona
GO FETILE mo e ka bago nywaga e mebedi ga e sa le Babilona e thopilwe ke Bamede le Baperesia. Bjale bona seo se diregago mo seswantšhong! Ee, Baisiraele ba tloga Babilona. Go tlile bjang gore ba lokollwe? Gona ke mang yo a ba lokolotšego?
Ba lokolotšwe ke Korese kgoši ya Peresia. Kgalekgale pele ga ge Korese a ka belegwa, Jehofa o ile a dira gore moporofeta wa gagwe Jesaya a ngwale ka yena, a re: ‘Wena Korese o tla dira seo ke nyakago o se dira. Dikgoro di ka se ke tša tswalelwa gore o thope motse woo.’ Korese o ile a etelela pele madira a gagwe go thopeng Babilona go etša ge go be go boletšwe. Bamede le Baperesia ba ile ba tsena motseng woo bošego ka dikgoro tšeo di bego di se tša tswalelwa.
Eupša Jesaya moporofeta wa Jehofa o be a boletše gape gore Korese o be a tla ntšha taelo ya gore Jerusalema le tempele ya yona di agwe lefsa. Na Korese o ile a ntšha taelo ye? Ee. O ile a botša Baisiraele a re: ‘Eyang Jerusalema gomme le age tempele ya Jehofa Modimo wa lena.’ Ka gona se ke sona seo Baisiraele bao o ba bonago mo ba yago go se dira.
Eupša ga se Baisiraele ka moka ba ba lego Babilona bao ba bego ba ka kgona go sepela leeto leo le letelele la go boela Jerusalema. E be e le leeto le letelele kudu la dikhilomithara tše e ka bago tše 800 gomme ba bantši ba be ba tšofetše kudu goba ba babja kudu go ka sepela leeto le bjalo. Le gona go be go na le mabaka a mangwe ao a bego a dira gore ba bangwe le bona ba šale Babilona. Eupša Korese o ile a bolela le bao ba bego ba šala a re: ‘Neang batho bao ba boelago morago go yo aga Jerusalema le tempele ya yona gauta, silifera le dimpho tše dingwe.’
Ka gona Baisiraele bao ba bego ba eya Jerusalema ba ile ba newa dimpho tše dintši. Le gona Korese o ile a ba nea dibjana le dikomiki tšeo Kgoši Nebukadinetsara a bego a di tšere tempeleng ya Jehofa nakong ya ge a be a senya Jerusalema. Setšhaba sa boela morago le dilo tše dintši.
Ka morago ga mo e ka bago dikgwedi tše nne, Baisiraele ba ile ba fihla Jerusalema ka nako. Go be go fetile nywaga e 70 ga e sa le motse wo o sentšwe gomme naga e be e le mašope. Gaešita le ge gona bjale Baisiraele ba dula nageng ya bona, ba sa dutše ba tla ba le mathata, bjalo ka ge re tlo ithuta ka seo.
Jesaya 44:28; 45:1-4; Esera 1:1-11.
Dipotšišo
- Bjalo ka ge go bontšhitšwe mo seswantšhong, Baisiraele ba dira’ng?
- Korese o ile a phethagatša bjang boporofeta bja Jehofa bjo bo boletšwego ke Jesaya?
- Ke’ng seo Korese a ilego a se botša Baisiraele bao ba bego ba ka se kgone go boela Jerusalema?
- Ke dilo dife tšeo Korese a ilego a di nea Baisiraele gore ba boele le tšona Jerusalema?
- Go ile gwa tšea nako e kaaka’ng gore Baisiraele ba fihle Jerusalema?
- Go be go fetile nywaga e mekae ga e sa le naga e tlogetšwe e le mašope?
Dipotšišo tša tlaleletšo
- Bala Jesaya 44:28 le 45:1-4.
Jehofa o ile a gatelela bjang gore boporofeta bja mabapi le Korese bo be bo tla phethagala e le ka kgonthe? (Jes. 55:10, 11; Baroma 4:17)
Boporofeta bja Jesaya bja mabapi le Korese bo bontšha’ng mabapi le bokgoni bja Jehofa Modimo bja go bolela e sa le pele ka dilo tšeo di tlago go direga nakong e tlago? (Jes. 42:9; 45:21; 46:10, 11; 2 Pet. 1:20)
- Bala Esera 1:1-11.
E le ge re latela mohlala wa bao ba ilego ba se kgone go boela Jerusalema, rena lehono re ka “thuša” bjang bao ba kgonago go tsenela tirelo ya nako e tletšego? (Esera 1:4, 6; Baroma 12:13; Bakol. 4:12)
