YANDOPITA pafupi-fupi magole mawiri kutomera pomwe Babulo adakundidwa na wa Mediya na Waperisi. Ndipo tsapano ona bzomwe bzinkucitika! Inde, Wajirayeri wankucoka ku Babulo. Kodi watsudzulidwa tani? Mbani awatsudzula?

Ni Siro, mambo wa ku Perisiya. Kale-kale, Siro akanati kubadwa, Yahova adauza mpolofeta Zaiya anemba bza iye kuti: ‘Iwepo un’dzacita bzomwe ndin’funa kuti ucite. Bzipata bzin’dzasiidwa bwanzu kuti ukunde mzindayo.’ Ndipo Siro ndiye adatsogoleradi pa kukundidwa kwa Babulo. Wamediya na Waperisi wadapita mu mzindamo na pa bzipata bzomwe bzikhadasiidwa bwanzu.

Tsono mpolofeta Zaiya akhadalewambo kuti Siroyo angadzatonga kuti amangidwe pomwe Jeruzalemu na tempwlo yace. Kodi Siro adadzatongadi bzimwebzo? Inde. Iye Siro adati kwa Wajirayeri: ‘Tsapano ndokoni ku Jeruzalemu, mucikakonza tempwlo ya Yahova, Mulungu wanu.’ Ndipo bzimwebzo ndibzo bzomwe Wajirayeriwa wankuyenda kukacita.

Tsono si Wajirayeri wense ku Babulo kule wadacita ulendo butalibo mpaka ku Jeruzalemu. Ulendobo bukhali butali kwene-kwene, makilometro 800, ndipo wazinji wakhali mkhalamba ayai atenda, ndipo bzingadawanesa kufamba. Ndipo yakhalipombo mathangwe manango kuti wanthuwo waleke  kuyenda. Tsono Siro adauza womwe wangadayenda liniwo kuti: ‘Perekani siliva na oro na mphaso zinango kwa wanthu wankubwererawa kuti wakamange Jeruzalemu na tempwlo yace.’

Tenepo, Wajirayeri wakhayenda ku Jeruzalemuwo wadapasidwa mphaso zizinji. Ndipo Siro adawapasambo mbale na makopo yomwe Mambo Nabukadinazori akhadatenga mu tempwlo ya Yahova pakupfudza Jeruzalemu. Wanthuwo wakhana bzinthu bzizinji bzakunyamula.

Watacita ulendo bwa minyezi minai, Wajirayeriwo wadafika ku Jeruzalemu mkati mwa nthawe. Yakhadapita magole 70 kutomera pomwe mzindawo udapfudzidwa, dzikolo lacikhala lakusaya wanthu. Tsono Wajirayeriwo wakhadabwerera ku dziko lawo, ndipo wangadagumanambo bzineso ninga momwe tiniwonera kutsogoloku.