MAJAʼ kqʼax kebʼ junabʼ che ri täq Babilonios xechʼak kumal ri medos xuqujeʼ ri persas. ¡Chawilampeʼ su tijan kbʼan kimik! Ri täq israelitas tijan keʼel bʼi Babilonia. ¿Su xkebʼano rech xeʼel bʼik? ¿Jachin laʼ xuya chike xebʼek?

Are Ciro, ri ajawinel rech Persia. Sibʼalaj kʼi täq junabʼ kraj na che kkʼejeʼ ri Ciro, Jehová xubʼij che ri ajqʼaxal utzij ubʼiʼ Isaías kutzʼibʼaj wariʼ: ‹Kabʼan ronojel chike kwaj kabʼano. Ktor kan ri uchiʼja chawäch rech katok bʼi che uchʼakik ri tinamit›. Rumal laʼ ri Ciro are ajkʼamal bʼe chiʼ xchʼak ri tinamit Babilonia. Ri täq medos xuqujeʼ ri täq persas xeʼok bʼi pa ri tinamit chaqʼabʼ chiʼ torom kan ri uchiʼja.

Xuqujeʼ ri Isaías xubʼij che, Ciro kuya jun taqonik che kyak chi na ri Jerusalén xuqujeʼ ri loqʼalaj ja rech Jehová. ¿La xuya ri ajawinel Ciro wajun taqonik riʼ? Jeʼ. Are waʼ xubʼij chike ri täq israelitas: ‹Jix pa ri Jerusalén, tekʼuriʼ chiyekaʼ chilaʼ ri loqʼalaj ja rech ri Ajawaxel Jehová›. Are waʼ xkebʼan ri täq israelitas.

Tekʼuriʼ konojel ta ri täq israelitas e kʼo Babilonia xekunik xkekʼam bʼi, o xkebʼan bʼi, jun nimalaj bʼe sibʼalaj naj. Xkekoj kajibʼ ikʼ rech xeʼopanik, tekʼuriʼ e kʼo kʼi winaq che kʼo yabʼil chike xuqujeʼ nikʼaj chike e riʼj chik. Xuqujeʼ kʼo nikʼaj chik rumal suche xebʼe täj. Tekʼuriʼ jachin kebʼe täj, ri Ciro xubʼij wariʼ chike. ‹Chiya bʼi saq pwäq, qʼan pwäq xuqujeʼ nikʼaj chik sipanik chike ri kebʼe che uyakik ri Jerusalén xuqujeʼ ri loqʼalaj ja›, xchaʼ.

Rumal laʼ ri täq israelitas xebʼe Jerusalén xkekʼam bʼi kʼi täq sipanik. Xuqujeʼ, Ciro xuya bʼi ri täq jaljoj uwäch laq chike, che ri ajawinel Nabucodonosor xresaj chupam ri loqʼalaj ja rech Jehová chiʼ xusach uwäch Jerusalén. Sibʼalaj e kʼi täq jastaq che ri tinamit xkekʼam bʼik.

Chiʼ qʼaxnäq chi kajibʼ ikʼ, ri täq israelitas xeʼopan Jerusalén. Qʼaxnäq chi 70 junabʼ chiʼ sachisam chi ri Jerusalén, tekʼuriʼ kʼot nijun winaq kʼo chilaʼ. Chiʼ e kʼo chi pa ri kitinamit kkeriq na kʼäx, chqilampeʼ su xkeriqo.