VAITATA rai e e rua mataiti i pou mei te opu anga to Madai e Peresia ia Babulonia. Ka akara ana e eaa te tupu ra i teianei! Ae, te akaruke nei to Iseraela ia Babulonia. Akapeea ratou i te tuku angaia? Naai ratou i tuku kia aere?

Na Kuro, te ariki o Peresia. Mua roa ake ka anau ei a Kuro, kua maani a Iehova i tana peroveta ko Isaia kia tata no runga iaia e: ‘Ka rave koe i taku tikai i inangaro ia koe kia rave. Ka ngaa ua te au ngutupa kia opu koe i te oire.’ Na Kuro i taki atu te opu angaia to Babulonia. Kua aere to Madai e Peresia ki roto i te oire i te po na roto i te au ngutupa e ngaa ua ra.

Inara kua akakite katoa te peroveta a Iehova ko Isaia e na Kuro e oronga i te akauenga kia patu akaouia a Ierusalema e tona iero. Na Kuro ainei i oronga i teia akauenga? Ae. Teia ta Kuro i akakite ki to Iseraela: ‘Aere i teianei ki Ierusalema, e e patu i te iero o Iehova to kotou Atua.’ Ko teia tikai ta te ngati Iseraela i rave.

Inara kare to Iseraela pouroa i roto ia Babulonia e rauka i te aere ki teia tere mamao ki Ierusalema. No te mea e mamao roa teia tere mei te 500 maire (800 kiro mita) e e maata ratou kua ruaine me kore kua maki i te aere mamao. Te vai atura tetai au tumu i kore ei tetai au tangata e aere. Tera ra kua akakite a Kuro ki te aronga kare i aere e: ‘Oronga i te ario e te auro e tetai atu au apinga aroa ki te aronga ka oki e patu ia Ierusalema e tona iero.’

No reira, e maata tikai te apinga aroa tei orongaia ki teia au Iseraela e aere ra ki Ierusalema. Kua oronga katoa a Kuro kia ratou i te au pa e te au kapu ta Nebukaneza i apai mei ko i te iero o Iehova i tona takore anga ia Ierusalema. Maata tikai te au apinga a te tangata e apai atura.

Muri ake i tetai a marama i te aere anga, kua tae atu to Iseraela ki Ierusalema i te taime tikai i akakoroia. E 70 rai mataiti mei te takoreia anga te oire, e kare rava e tangata i runga i te enua. Inara noatu e tei roto to Iseraela i to ratou uaorai enua, ka na roto ratou i te au tuatau ngata, mei ta tatou ka apii a muri mai.