MEEDOONINNA Faarsi daga Baabiloonete gobba amaddunku lamu diri geeshshi saino. Xa kayinni mayi ikkanni nooro lai! Isiraeelete manni Baabiloonetenni fulanni no. Insa borojjimmatenni fultinohu hiittoonniiti? Fushshinonsahu ayeeti?

Fushshinonsahu Qiroosi yinanniho Faarsi nugusaati. Qiroosi ilamara lowo diri albaanni, Yihowa masaalaanchosi Isayyaasi isire borreessanno gede assino. Isayyaasino togo yee borreessino: ‘Ati ani hasiˈroommore assatto. Katama amadatto gede xullichchu faˈnamannohe.’ Konni garinni Baabiloonete katama amadate haˈranno wottaaddara massaginohu Qiroosiiti. Meedooninna Faarsi wottaaddari hashsha fano agurroonni xullichchi widoonni hige katama ei.

Qoleno Yihowa masaalaanchi Isayyaasi, Qiroosi Yerusaalamenna hakko nooha Maganu mine layinkimeeshsho minnanni gede hajajannota coyiˈrino. Qiroosi tenne hajajo fushshiyya? Ee, fushshino. Qiroosi Isiraeelete manna togo yii: ‘Xa Yerusaalame hadhine, Maganiˈne Yihowa mine minne.’ Kuni Isiraeelete manni haˈranni noohu konne mine minaraati.

Ikkollana Baabiloonete noohu Isiraeelete manni gudisire seeda doogo haˈre Yerusaalame iille diafanno. Haˈnanni doogo 800 kiilomeetire geeshsha ikkitanno; lowo geeshsha seedate. Qoleno haammatu Isiraeelete manni geedhinonna xiwamino daafira xeerto doogo haˈre diafanno. Gama manna Yerusaalame haˈrannokki gede assinori wolurino no. Qiroosi haˈre afannokki manna togo yii: ‘Yerusaalamenna hakko nooha Maganu mine minara haˈranno mannira birra, worqenna wole elto uyiyye.’

Konni daafira mannu Yerusaalame hadhanno Isiraeelera lowo elto uyi. Qoleno Qiroosi, Nugusu Nabukedenetsoori Yerusaalame giiri waro Yihowa mininni abbino saannanna xaassa konni mannira uyi. Mannu Yerusaalame haaˈre haˈrannohu lowo uduunni no.

Isiraeelete manni shoolu agani doogo haˈri gedensaanni, Yerusaalamete katama yinoonni yannanni iilli. Katamu giiraminkunni 70 diri saino; gobbano mittu manchi nookkiha keeshshitino. Xa Isiraeele gobbansa higginoha ikkirono, dagginowa qarru iillansaraati; aanchine tenne hajore ronseemmo.