ATUBOROS bala ikar iarei ageun na ekamariata Imedin ka Iperesian Babulon. Ongolia nuiswamas kwana! Eebo, anyou ekodet loka Israel ko Babulon. Kelacakinos kesi biai? Ingai acamakini kes alosit?

Kuro, ekabaka loko Perusia nges acamakini. Sek eringa Kuro keuruna, abu Yawe koinak ekenabi Isaia aiwadik nuikamutos nges: ‘Iswamauni ijo ngun nuakoto eong ijo aswam ejalakinio irutei engaara kanu ijo aikamar ere.’ Teni abu Kuro kingarenik aikamario naka Babulon. Kolomutu Imedin ka Iperesian ore kware kitoritos orutei luajalakitai engara.

Konye abala bobo Isaia enabi loka Yawe ebe icorakini Kuro adukio bobo naka Yerusalem ka eyekalu. Abu Kuro kicorak? Eebo. Nuu kes abu Kuro olimok itunga luko Isirael: ‘Koloto, Yerusalem ido kodukoto eyekalu loka Yawe, Edekekus.’ Nu kes ejaas itunga luko Isirael alosit aswam.

Konye mam idwe luka Isirael luejaasi Babulon kere epedore alosit abongor Yerusalem. Elwana erot amairon bala 500, luipu emojongito noi icie edekasi noi. Ejaas atiokisio acie nuitukuroritos icietunga alosit. Kolimok Kuro ngul lumam epedorete alosit: ‘Oinakisi luebongorete aiduk Yerusalem ka ekeyekalu, esabu ka ainakineta.’

Aso koinakinai Isiraelin ngul luabongorete Yerusalem ainakineta nuipu. Bobo, koinak Kuro kes abakulin ka aikopon luayangarit Ekabaka Nebukadenesar koyekalu loka Yawe ne amudiara Yerusalem. Ipu noi iboro luebeit itunga aibwok ainyakar.

Akaulo na alosite korot ilapio lueapiarete iwongon, kodoleto itunga luko Isirael Yerusalem kotoma apak alope. Erai cut ikaru 70 anyoun amudiaro naka ere, kosalakinite akwap emamete itunga. Konye araida ebongutos itunga luko Isirael akwap kec edumunete atiokisio adis, kwape isisiauna oni.