80-нҗи хекая

Худайың халкы Бабылдан чыкяр

МИДИЯЛЫЛАР билен парслар Бабылы басып аланындан бәри, ики йыла голай вагт гечди. Инди болян затлара серет! Хава, ысрайыллылар Бабылдан чыкып барярлар. Азатлыга чыкмак олара нәдип башартды? Ким олара ругсат бердикә?

Парс патышасы Кир ругсат берди. Хениз Кир догулманка, ол барада: «Сен мениң ислегими ерине етирерсиң. Сен шәхери басып аларсың. Онуң дервезелери ачык галар» дийип, Ехова Ишая пыгамбере яздыряр. Айдышы ялы хем болды. Кириң баштутанлыгында Бабыл басылып алынды. Гиҗе дервезе ачык галаны себәпли, мидиялылар ве парслар шәхере гирйәр.

Мундан башга-да, Ехованың пыгамбери Ишая Иерусалими ве онуң ыбадатханасыны дикелтмәге Кириң буйрук берҗегини айдяр. Кир шейле буйрук бердимикә? Хава, берди. Кир ысрайыллылара: «Хәзириң өзүнде Иерусалиме гидип, Ехова Худайыңыза ыбадатхана гуруң» диййәр. Шонуң үчин ысрайыллылар ёла дүшйәр.

Эмма Бабылда яшаян ысрайыллыларың хеммеси Иерусалиме элтйән узак ёлы гечип билмейәр. Ёлуң узаклыгы 800 километре голайды, ысрайыллыларың көпүси болса гаррыды я-да кеселди. Кәбир ысрайыллылар болса, башга себәп билен галярлар. Олара Кир: «Иерусалими ве онуң ыбадатханасыны дикелтмәге барян адамлара күмүш, алтын ве башга совгатлары бериң» дийип буюряр.

Шейдип, Иерусалиме доланан ысрайыллылар көп совгатлы гайдярлар. Шейле-де Кир патыша хем олара Небукаднезарың Иерусалимдәки ыбадатханадан алан кәселерини ве гапларыны берйәр. Халк яны билен көп зады алып гидйәр.

Ысрайыллылар ёлы дөрт айда гечип, Иерусалиме айдылан вагтында доланярлар. Шәхериң йыкылып, юрдуң адамсыз галанына 70 йыл болупды. Йөне индики бапдан, ысрайыллылар юрдуна доланса-да, көп кынчылык чекендигини билерис.

Ишая 44:28; 45:1—4; Эзра 1:1—11.