JUN xa chabʼ jabʼil ekʼel man ja Babilonia aji chʼaysnajel yuja swinkil Media soka Persia. Kʼela ja jasa wan ekʼeli: ja israʼelenyo wane elel ja bʼa Babilonia. ¿Jastal lek elume? ¿Machʼa yaʼakan aʼeluke?

Yeʼn ja mandaranum bʼa Persia, ja Ciro. Jitsan jabʼil bʼajtanto yuj oj pojkuk, Jyoba skʼulan ja yaluman Isaías a-stsʼijbʼuk sbʼaja yeʼn: «Oj akʼuluk ja jas wa xkʼana oj akʼuluki. Ojni kan jaman ja spwertaʼil ja chonabʼi bʼa oj abʼajinkan». Ciro yeʼnani stojo ja skʼakʼanumiki bʼa oj sbʼajinkan ja Babilonia. Ja kʼakʼanum bʼa Media soka bʼa Persia akʼwal ochye ja bʼa yoj chonabʼi yujni ja pwertaʼi akʼubʼalkan jaman.

Chomajkil, ja Isaías, ja yaluman ja Jyoba, yala ja mandaranum Ciro oj yakan ja Jerusalén soka stemplo aʼajuk kʼeʼuk yajkʼachil. ¿Yaʼa maʼ ja mandar it ja Ciro? Yaʼa. Ja it ja jas yala yabʼ ja israʼelenyo: «Kaʼaxik bʼa Jerusalén sok awik kʼe yajkʼachil ekʼele ja stemplo ja Jyoba wa Dyosexi». Sok jani it ja jas wa xwaj skʼuluke ja israʼelenyo.

Pe mi spetsaniluk bʼa yeʼnle wa xbʼobʼ yujile oj yaweyi ja niwan najat bʼejyel man Jerusalén. Juni najat bʼejyela: jun chane ixaw wa xyiʼaj ja oj kʼotukeʼi. Jitsan bʼa yeʼnle jelxa awele sok tuk yaj chamel aye bʼa oj wajuke. Chomajkil ay pilan rasonik. Pe ja matik mi xwajyeʼi, Ciro wa xyala yabʼ: «Awikyi plata, oro sok tuktukil majtanal ja matik wa xwajye bʼa oj yawe kʼeʼuk yajkʼachil ekʼele ja Jerusalén soka stemplo».

Ja yuj yajni ja israʼelenyo wajye ja bʼa Jerusalén aji och yile jitsan majtanal. Chomajkil, ja Ciro yaʼa och ja basijaʼik soka bʼisik yiʼajan ja mandaranum Nabucodonosor bʼa stemplo ja Jyoba yajni ya chʼaysnajel ja Jerusalén. Jelni jitsan ja jastik junuk yiʼaje och ja israʼelenyo.

Tsaʼan yajni ekʼta jun chane ixaw wane bʼejyeli, ja israʼelenyo malan lek kʼotye ja bʼa Jerusaleni. Ekʼelxa ni 70 jabʼil man ja chonabʼi aji chʼaysnajel sok mini jun swinkil kani. Pe anima ja israʼelenyo tixa aye ja bʼa xchonabʼe, ojni ajyuk yujile jitsan wokol, jastal ni oj kiltik.