NIʼATAKGATSI akgtiy kata akxni li Media chu li Persia akgchipakgolh Babilonia. ¡Chu uku kaʼakxilhti tuku lama! Li Israel taxtumakgolh kBabilonia. ¿La tlawakgolh xlakata tlan taxtukgocha? ¿Chu tiku kamaxkilh talakaskin nataxtukgoy?

Wa Ciro, mapakgsina xalak Persia. Makgas kilhtamaku akxni Ciro niaxlakachin Jehová tlawalh pi palakachuwina Isaías katsokgli uma, xlakata Ciro: Wix natlawaya tuku akit klakaskin natlawaya. Namalakkiyawakan malakcha xlakata wix tlan naʼakgchipaya uma kachikin. Chu chuna kgantaxtulh, Ciro pulalilh akxni akgchipaka Babilonia. Xlakata xmalakkiyawakanit anta kBabilonia li Media chu li Persia tanukgolh katsisni.

Pero xpalakachuwina Jehová Isaías na tiwa pi wa Ciro xmakaxtlawinalh Jerusalén chu xtemplo Jehová. ¿Mastalh limapakgsin Ciro pi chuna natlawakan? Chuna, uma tachuwin kawanilh li Israel: Kapitit anta kJerusalén chu katlawaparatit templo xla Dios Jehová. Chu li Israel chuna tlawakgolh.

Pero niputum li Israel tiku wilakgolh kBabilonia tlan naʼankgoy kJerusalén xlakata lu makgat. Wanaw pi lu makgat xlakata 800 kilómetros lichankan kJerusalén chu lhuwa li Israel lu laktataja chu makgapitsi tatatlakgoy. Chu na wilapa atanu xlakata makgapitsi nila ankgoy. Pero wantiku ni naʼankgoy Ciro kawaniy: Kakamaxkitit plata chu oro chu katuwa tuku kakamaskiwitit tiku naʼakgoy xlakata natlawakan Jerusalén chu templo.

Wa xlakata li Israel tiku ankgolh kJerusalén lhuwa tamaskiwin makgamakglhtinankgolh. Chu Ciro na kamaxkilh tazones chu copas wa nema mapakgsina Nabucodonosor xliminitancha kxtemplo Jehová akxni malakgsputulh Jerusalén. Lu lhuwa tuku linkgolh li Israel.

Chu akxni xtitaxtunitta akgtati papaʼ chankgolh kJerusalén, kilhtamaku akxni xtakgatsima 70 kata akxni malakgsputuka Jerusalén. Chu maski li Israel taspitkgolh kxkachikinkan lu xakatuwa natitaxtukgoy chuna la naʼakxilhaw.