CIŴANDIKA yaka yiŵili yimasile Babelo ali ajonanjikwe ni Amedi ni Apelesi. Sambano alole yayikutendekwayo! Ayisalayeli akutyoka ku Babelo. Ana yakombolece wuli kuti atyoce? Nduni juŵakundile jemanjaji kuti atyoce?

Kolesi, mwenye jwa ku Pelesiya ni juŵakundile. Munyuma Kolesi mkanapagwe, Yehofa ŵamsalile jwakulocesya Yesaya kulemba yakwamba jwalakwe kuti: ‘Cimcitenda kwene yangusaka kuti m’yitende. Matanga gaciŵa gamawugule kuti mmwejo m’wugomece msindawo.’ Kolesi ni juŵalongolele pakugomeka Babelo. Amedi ni Apelesi ŵajinjile mu msindamo cilo kupitila m’matanga gaŵagalesile gali gangawugala.

Nambo Yesaya jwakulocesya jwa Yehofa ŵaŵecetesoni kuti Kolesi cacipeleka lilamusi lyakuti Yelusalemu ni nyumba jakulambilila ayitaŵesoni. Ana Kolesi ŵapelece lilamusili? Elo kwene ŵapelece. Kolesi akwasalila Ayisalayeli kuti: ‘Sambano jawulani ku Yelusalemu ni mkataŵe nyumba jakulambilila Yehofa, Mlungu jwenu.’ Ni ligongo lyakwe Ayisalayeliŵa akwawula kukutenda yeleyi.

Nambo ngaŵaga Ayisalayeli wosope ŵampaka akombole kwawula ku Yelusalemu. Wuli ulendo welewu, ciŵandika mamayilosi 500 (makilomita 800) soni ŵandu ŵajinji ŵaliji akalambele, kapena ŵakulwalalwala mnope, mwati ngaŵa mkupakombola kwenda ulendo welewu. Soni pana magongo gane gele ŵandu ŵane ngakwawula nawo. Nambo Kolesi akwasalila ŵangakwawulawo kuti: ‘Apelece silifa ni golidi, soni mituka jine kwa ŵandu ŵakwawula kukutaŵa Yelusalemu ni nyumba jakulambilila.’

Sambano, mituka jejinji akujipeleka kwa Ayisalayeli ŵakwawula ku Yelusalemu. Nambosoni, Kolesi akwapa mbale ni makapu, yaŵayijigele mwenye Nebukadinesala mu nyumba jakulambilila Yehofa paŵajonangaga Yelusalemu. Ŵanduwo akwete yindu yejinji yakuti anyakule pakwawula.

Ali ajesile kwa miyesi ciŵandika mcece, Ayisalayeli akwika ku Yelusalemu pandaŵi jakwe. Yaka 70 yigambile kwana kwene cijonanjile msindawo, soni m’cilambomo nganimusigala mundu jwalijose. Nambo atamose kuti Ayisalayeli ayice kucilambo cakumangwawo, casimane ni yipwetesi, mpela mwacituyiwonele m’bujomu.