NÍ KASEMI 81
Mawu Yemi Kɛ Buami Mi He Kɛ Nɔ Fɔmi
NIMLI akpehi abɔ lɛ kpale kɛ je Babilon kɛ ba Yerusalem ɔ nɛ. Benɛ a ba su Yerusalem ɔ, ma a puɛ kulaa. Nɔ ko nɔ ko be ma a mi. E sa kaa Israelbi ɔmɛ nɛ́ dla nɔ́ tsuaa nɔ́ ekohu.
Níhi nɛ a pee kekleekle ɔmɛ a kpɛti kake ji afɔle sami latɛ ɔ nɛ a ma. Latɛ ɔ nɔ ji he nɛ a maa ngɔ lohwehi kɛ sã afɔle kɛ ha Yehowa ngɛ. Nɛ nyɔhiɔ bɔɔ se ɔ, Israelbi ɔmɛ je sɔlemi we ɔ mami sisi. Se henyɛli nɛ ngɛ mahi nɛ bɔle mɛ ɔ a mi ɔ sume kaa Israelbi ɔmɛ nɛ ma sɔlemi we ɔ. Lɔɔ he ɔ, a wo a he gbeye konɛ a kpa nítsumi ɔ. Nyagbe ɔ, henyɛli nɛ ɔmɛ ha Persia matsɛ ehe ɔ wo mlaa kaa a kpa sɔlemi we ɔ mami.
Jehahi fuu ba be. Nɛ jeha 17 ji nɛ ɔ, nɛ Israelbi ɔmɛ je Babilon kɛ ba. Yehowa tsɔ e gbali nɛ ji Hagai kɛ Zakaria kaa a ya de Israelbi ɔmɛ nɛ́ a tsa nítsumi ɔ nɔ. Mabi ɔmɛ ngɔ a he kɛ fɔ Mawu yemi kɛ buami nɔ, nɛ a bu gbali ɔmɛ tue. E ngɛ mi kaa a wo mlaa kaa a ko ma tsu ɔ mohu, se Israelbi ɔmɛ tsa tsu ɔ mami ɔ nɔ.
Lɔɔ he ɔ, Persia amlaalo ko nɛ a tsɛɛ lɛ Tatenai ba bi Israelbi ɔmɛ nɔ nɛ ha mɛ he blɔ loko a ngɛ sɔlemi we ɔ mae ɔ. Israelbi ɔmɛ de lɛ ke benɛ a ngɛ Babilon ɔ, Matsɛ Koresh de mɛ ke: ‘Nyɛɛ ya Yerusalem amlɔ, nɛ nyɛ ya ma Yehowa nyɛ Mawu ɔ sɔlemi we ɔ.’
Tatenai ngma womi kɛ ya Babilon kɛ ya bi keji kaa Koresh nɛ e gbo ɔ ha Israelbi ɔmɛ blɔ niinɛ kaa a ma tsu ɔ. E kɛ we nɛ womi je Persia matsɛ ehe ɔ ngɔ kɛ ba. E tsɔɔ kaa Koresh ha mɛ blɔ niinɛ. Nɛ nɔ́ nɛ matsɛ ɔ ngma ji: ‘Nyɛɛ ngmɛɛ Israelbi ɔmɛ a he nɛ a ma a Mawu ɔ sɔlemi we ɔ. Nɛ i ngɛ nyɛ fãe kaa nyɛ ye bua mɛ kɛ tsu ní ɔ.’ Ngɛ jeha eywiɛ mi ɔ, Israelbi ɔmɛ gbe tsu ɔ mami nya, nɛ mabi ɔmɛ a bua jɔ saminya.
Maa pee jeha 48 ji nɛ ɔ, nɛ́ a gbe sɔlemi we ɔ mami nya. Nihi nɛ ngɛ Yerusalem ɔ ye ohia, nɛ ma a kɛ Yehowa sɔlemi we ɔ be fɛu hu kulaa. Ezra ná le ngɛ Babilon kaa e sa nɛ a dla Yehowa sɔlemi we ɔ. Lɔɔ he ɔ, o le nɔ́ nɛ e pee lo?
Ezra ya na Persia matsɛ Artaherhes, nɛ matsɛ kpakpa nɛ ɔ ha Ezra nike ní fuu konɛ e kɛ ya Yerusalem. Ezra de Israelbi ɔmɛ nɛ ngɛ Babilon ɔ kaa a ye bua lɛ kɛ ngɔ nike ní ɔmɛ kɛ ya Yerusalem. Nihi maa pee kaa 6,000 kplɛɛ nɔ kaa a maa ya. A ná sika tsu kɛ sika hiɔ, kɛ ní kpahi nɛ́ he jua wa fuu nɛ a kɛ maa ya Yerusalem.
Ezra hao, ejakaa nimli yayamihi ngɛ blɔ ɔ nɔ. Eko ɔ, nimli yayamihi nɛ ɔmɛ ma kpɔ sika tsu kɛ sika hiɔ ɔ ngɛ a dɛ, nɛ a maa gbe mɛ. Lɔɔ he ɔ, Ezra tsɛ ni ɔmɛ tsuo nɛ a ba bua a he nya kaa bɔnɛ o na ngɛ foni ɔ mi ɔ. Kɛkɛ nɛ a sɔle kɛ ha Yehowa konɛ e bu a he ngɛ blɔ gagaaga nɛ a maa hia kɛ kpale kɛ ya Yerusalem ɔ mi.
Yehowa bu a he niinɛ. Nɛ benɛ a hia blɔ nyɔhiɔ eywiɛ se ɔ, a ya su Yerusalem slɔkee. Anɛ enɛ ɔ tsɔɔ we wɔ kaa Yehowa ma nyɛ maa bu nihi nɛ ngɔɔ a he kɛ fɔɔ e nɔ kɛ ha yemi kɛ buami ɔ he lo?