EPE KECHU mari warangka che tripayngün Babilonia pingechi waria, ka amuyngün Jerusalen. Welu puwlu (powlu) engün, Jerusalen kom afküleychi waria. Iney (iñi) no rume ngelay feymu. Tati pu Israel che müley ñi kom wiño dewmatual engün.

Wüne ñi dewmal engün fey kiñe altar. Tüfa feyta chew yengekefuy yewün, ka mañumtun kulliñ, chew elkünulngekefuy Jewba. Pichin (püchün) küyen müten rupalu, pu Israel che ka dewmatuyngün tati ngillatuwe ruka. Welu tati pu kayñe kañpüle inafül mülechi mapu, ayüyngün ñi llükalkayafiel, ka ñi katrütuafiel tañi küdaw. Af mew, tati pu kayñe perpuyngün ti we rey mülelu Persia mew, ñi entual kiñe ley dungu ñi katrütuafiel tañi dewmayal ñi küdaw.

Dew rupay mari regle tripantu tati pu Israel che wiñolu Babilonia mu. Ngünechen werküy tañi epu pelon wentru Ageo ka Sakaria engu, tañi feypiafiel tati pu che tañi wiño dewmayal ñi küdaw engün. Tati pu che maneluwi engün Ngünechen tañi kellun mew, ka feyentufingün (müngeltufingün) tati epu pelon wentru. Ka wiño küdawi engün chi ruka mu, welu kiñe ley ‘femlayaymün’ pifeyew engün.

Feymu lle, kiñe persa ofisial Tatenay pingelu, akuy ka ramtupay: ‘¿Iney am feypieymünmu tamün dewmayal ti ngillatuwe ruka?’ Pu Israel che wiñoldungueyew Babilonia mu ti rey Siro feypieyew: ‘Amumün Jerusalen, dewmamün tamün Ngünechen Jewba ñi ngillatuwe ruka.’

Tatenay werküy kiñe chillka Babilonia mu ñi ramtual Siro rüfngen tañi feypikünun, welu Siro dew larkey. Pichin antü mew ti we rey Persia, wiño werküy kiñe chillka, ta feypiley rüf ngen feychi dungu. Feymu lle ti rey wirintükuy: ‘Elkünufimün pu Israel che tañi dewmayal tañi Ngünechen ñi ngillatuwe ruka. Ka werküwayiñ tamün kelluafiel engün.’ Meli tripantu mu chi dewmayngün ti ngillatuwe ruka, ka tati pu Israel che rume (mütre) ayüwküleyngün.

Ka alün tripantu rupay. Meli mari pura tripantu rupay chi ñi dewmangeel tati ngillatuwe ruka. Tati pu che mülelu Jerusalen, rume pofrengey engün, ka tati waria ka Ngünechen ñi ngillatuwe ruka newe adkülelay. Üye Babilonia mew kiñe Israel che Esdra pingelu, kimürpuy ñi küme elngeal tati Ngünechen ñi ngillatuwe ruka. Fey mu, ¿kimimi tañi chumün?

Esdra pemefi Artajerje, Persia mülechi rey, ka tüfachi küme rey elufi Esdra alün kümeke yewün tañi yeal ta Jerusalen. Esdra ngillatufi tati pu Israel che mülelu Babilonia tañi kelluaetew, kiñe kayu warangka che peno ‘amuayiñ’ pi engün. Yey engün alün plata ka milla ka falinke chemkün.

Esdra rakiduamküley, müley rume wedake wentru rüpü mew. Tüfachi pu wentru müntuñmayafuy engün tañi plata ka milla, ka langümafuy engün. Fey mu Esdra trawülfi tati pu che, chumngechi peafuymi tüfachi adentun mu. Fey mu llellipufi Jewba tañi kelluaetew tañi kamapu ñi wiño amutual engün Jerusalen mu.

Jewba ingkañpeeyew engün. Ka rupalu meli küyen, küme puwi (powi) engün Jerusalen mu. ¿Pengeleiñmu tüfa, Jewba tañi ingkakefiel kom tati pu maneluwkülelu kidu mu?