ABANTU 50,000 e baendele lulya ulwendo ulutali ukufuma mu Babiloni ukuya ku Yerusalemu. Lelo ilyo bafikile, basangile umusumba wa Yerusalemu walyonaika sana. Tamwali na baleikalamo. Abena Israele balingile ukutendeka ukukuula fyonse cipya cipya.

Ico babalilepo ukukuula, cipailo. Icipailo e co baleocelapo inama ne fya bupe fimbi ifyo balepeela Yehova. Pa numa ya myeshi iinono, abena Israele batendeke ukukuula itempele. Lelo abalwani babo abaleikala mu fyalo fyali mupepi, tabalefwaya abena Israele ukukuula. E ico batendeke ukubatiinya pa kuti baleke ukukuula. Basukile baeba imfumu ipya iya bena Persia ukupanga ifunde ilya kukaanya abena Israele ukukuula.

Imyaka yalepita fye. Yehova asukukile atuma bakasesema bakwe, Hagai na Sekaria ukuyaeba abantu ukutendeka ukukuula itempele na kabili. Apa ninshi palipita imyaka 17 ukutula apo abena Israele babwelele ukufuma ku Babiloni. Abantu balicetekele ukuti Yehova alabafwa, kabili balicitile ifyo bakasesema balandile. Batendeke ukukuula na kabili, nangu ca kuti ifunde lyalibakeenye ukukuula.

E ico Tatinai, umukalamba mu buteko bwa bena Persia aile ku bena Israele no kubepusha uwabasuminishe ukukuula itempele. Abena Israele bamwebele ukuti ilyo bali mu Babiloni, Imfumu Sailasi yabebele ati: ‘Kabiyeni ku Yerusalemu nomba line ku kukuula itempele lya kwa Yehova, Lesa wenu.’

Tatinai atumine kalata ku Babiloni umo aipwishe nga ca kuti Sailasi e wabebele ukukuula itempele. Ilya nshita ninshi Sailasi alifwa kale. Imfumu ipya iya bena Persia yalibweseshe kalata bwangu bwangu. Ya-aswike ati, Sailasi alilandile ayo mashiwi. E ico imfumu yalembele ati: ‘Lekeni abena Israele bakuulile Lesa wabo itempele. Kabili ndefwaya mubafwe.’ Bapwishishe ukukuula itempele mu mupepi ne myaka 4, kabili abena Israele balitemenwe sana.

Itempele lyalipwile papita ne myaka iingi. Imyaka yapitilepo yalifikile na 48. Pali iyi nshita abantu mu Yerusalemu batendeke ukucula. Umusumba ne tempele lya kwa Lesa fyalilekele ukumoneka bwino. Esra, umwina Israele uwali mu Babiloni alyumfwile ukuti itempele lya kwa Lesa lyalefwaikwa ukuwamya. Bushe walishiba ico acitile?

Esra ailelondolwela Artakishashete, imfumu ya ku Persia, kabili iyi imfumu iisuma yapeele Esra ifya bupe ifingi ifya kusenda ku Yerusalemu. Esra aebele abena Israele abali mu Babiloni ukumwafwako ukutwala ifya bupe ku Yerusalemu. Abantu nalimo 6,000 balisumine ukuya. Balikwete silfere iingi na golde e lyo ne fintu fimbi ifya mutengo ifya kusenda.

Esra alisakamene, pantu umo balepita mwali abantu ababi imitima. Aba bantu limbi nga balipokele silfere na golde no kubepaya. E ico Esra aitile abantu ukuti balongane nga fintu ulemona pa cikope. Lyena bapepele kuli Yehova ukuti abacingilile mu lwendo ulutali ulwa kubwelela ku Yerusalemu.

Yehova alibacingilile kabili balifikile fye bwino mu Yerusalemu pa numa ya myeshi 4. Bushe ili ilyashi talitulanga ukuti Yehova alacingilila abacetekela ukuti alaafwa?