TUNUNU twa atu anakalinga wenyi usuku chize ku Babilonia ndo ku Yerusaleme. Alioze, muze ayo ahetele ko, yawana Yerusaleme te hiyapwa wika mu yikulu. Niumwe mutu te katwaminemo. A-Izalele yaputuka kutungulula chakacheka yuma yeswe.

Chuma chitangu aliangile kutunga chilumbilo. Chili chimwe chihela chakuhanyina milambu hanji yitapo ya yimuna kuli Yehova. Kulutwe lia amwe tukweji A-Izalele yaputuka kutunga tembele. Alioze, akwa kole waze te atwama mu yifuchi ya hakamwihi ni A-Izalele, kakazangile ngwo ayitunge. Kashika, ayo yeseka kweevwisa woma hanga eche kuyitunga. Hi akwa kole yahasa kuhanjika ni mwanangana mwaha wa Persia hanga ahane yimwe shimbi yakukanjisa mulimo wa utungilo.

Miaka yiyipalika. Haliapwila te hikwapalika miaka 17 chize muze A-Izalele akatukile ku Babilonia. Yehova yatuma aprofeta jenyi, Hagaia ni Zekaria hanga alweze atu aputuke kutunga cheka. Atu yajikijila ku ukwaso wa Zambi, nawa ayo yononokena kuli aprofeta. Ayo yaputuka kutunga cheka, chipwe ngwe te shimbi yinambe ngwo ayo katambile kuchilinga.

Kashika, yikwiza umwe kapitau wa Persia, jina lienyi Tatenaia, yahula ngwo, ni chiyulo chaya A-Izalele anatungu nacho tembele. A-Izalele yamukumbulula ngwo, muze ayo apwile mu Babilonia, mwanangana Siru kanakaamba ngwo: ‘Yenu haliapwila ku Yerusaleme hanga nutunge tembele ya Yehova, Zambi yenu.’

Tatenaia yatuma umwe mukanda ku Babilonia, hanga ahule nyi Siru che ambile, mumu te hanafu. Mba mwanangana mwaha wa Persia neye yatuma mukanda. Iye yasoneka ngwenyi, mba, Siru che ambile. Mwanangana yasoneka nawa ngwenyi: ‘Echa A-Izalele atunge tembele ya Zambi yo. Nawa ngunakutumu hanga waakwase.’ Tembele yinakalinga unji wa miaka yiwana mba yiyihwa, nawa A-Izalele yawahilila chinji.

Yikupalika amwe 48 a miaka chize muze ahwishile tembele. Atu a mu Yerusaleme te hapwa mu uswale unji, mbonge ni tembele ya Zambi te yisokupema nawa. Ku Babilonia, Ka-Izalele Ezera yanyingika kuhona chize te chili mu tembele ya Zambi. Yena unanyingika yize iye anakalinga?

Ezera yaya kuli Artasherke, mwanangana wa Persia, nawa mwanangana yono mupema yahana kuli Ezera yawana yinji hanga ambate hakuya ku Yerusaleme. Ezera yeta kuli A-Izalele waze te ali mu Babilonia hanga amukwase kumbata yawana yacho ndo ku Yerusaleme. Unji wa 60,000 a atu yatayiza ngwo mutuya. Ayo yambata yuma yinji ngwe prata, oru ni yuma yikwo nawa yipema.

Ezera yevwa woma, mumu te mujila mwatwama malunga api. Malunga jacho te mahasa kutambula prata ni oru, nawa hanji ni kwashaha. Kashika, Ezera yakungulula atu, ngwe chize unamono ha chizulie. Mba ayo yalemba kuli Yehova hanga aafunge mu wenyi wacho usuku wa kuya ku Yerusaleme.

Yehova yaafunga. Hi, kulutwe lia tukweji awana mba ayo yaheta kanawa mu Yerusaleme. Yino yiso kusolola ngwo Yehova mahasa kufunga atu waze akujikijila kuli iye?