Plizyer milye dimoun ti fer sa gran vwayaz depi Babilonn ziska Zerizalenm. Me kan zot ti arive, zot ti vwar en ta dega dan sa lavil. Ti napa personn ki ti pe reste la. Bann Izraelit ti bezwen rearanz tou keksoz.

Premye keksoz ki zot ti fer ti en lotel. Sa ti en landrwa kot zot ti kapab ofer bann zannimo oubyen kado avek Zeova. Enn de mwan plitar bann Izraelit ti konmans konstri tanp. Me zot bann lennmi ki ti pe reste dan bann pei dan zalantour pa ti oule ki bann Izraelit i konstri sa tanp. Alor zot ti esey fer bann Izraelit per pour fer zot aret konstri sa tanp. Finalman, sa bann lennmi ti fer nouvo lerwa Pers fer en lalwa pour aret sa travay.

Bann lannen ti pase. Ti fer 17 an depi ki bann Izraelit ti’n retourn Zerizalenm. Zeova ti anvoy son profet Agai ek Zekarya pour demann bann dimoun pour rekonmans konstri tanp. Bann dimoun ti annan konfyans ki Bondye pou ed zot, e zot ti obei sa de profet. Zot ti konmans konstri ankor, menm si ti annan en lalwa ki ti dir ki zot pa ti merit konstri tanp.

Alor en zofisye Pers ki ti apel Tatenai ti vini e demann bann Izraelit ki drwa zot annan pour konstri sa tanp. Bann Izraelit ti dir li ki kan zot ti Babilonn, Lerwa Siris ti dir zot: ‘Aprezan, al Zerizalenm e konstri tanp Zeova, zot Bondye.’

Tatenai ti anvoy en let Babilonn dan ki i ti demande si Siris, ki ti’n mor aprezan, ti’n vreman dir sa. Deswit nouvo lerwa Pers ti rann larepons e i ti dir ki Siris ti’n vreman dir sa. Lerwa ti ekrir: ‘Les bann Izraelit konstri tanp zot Bondye. E mon donn zot lord pour ed zot.’ Dan apepre 4 an tanp ti’n fini ganny konstri, e bann Izraelit ti vreman kontan.

Bokou lannen ti pase. Ti fer apepre 48 an depi ki tanp ti’n fini konstri. Bann dimoun an Zerizalenm ti mizer, e sa lavil ek tanp Bondye pa ti dan en bon leta. Ezra en Izraelit ki ti an Babilonn ti aprann konsernan sa bezwen pour aranz tanp Bondye. Eski ou konnen ki i ti fer?

Ezra ti al kot Artazekses, lerwa Pers, e sa bon lerwa ti donn Ezra en kantite kado pour anmenn Zerizalenm. Ezra ti demann bann Izraelit ki ti an Babilonn pour ed li pour anmenn sa bann kado Zerizalenm. Apepre 6,000 dimoun ti dakor pour ale. Zot ti annan en kantite larzan ek lor ek lezot keksoz presye pour anmenn avek zot.

Ezra ti en pe enkyet, akoz ti annan bann move zonm dan semen. Sa bann zonm ti kapab pran zot larzan ek lor, e touy zot. Alor Ezra ti rasanble bann dimoun, parey ou kapab vwar dan sa portre. Apre zot ti priy Zeova pour protez zot pandan zot gran vwayaz pour retourn Zerizalenm.

Zeova ti protez zot. Apre ki zot ti’n vwayaze pour 4 mwan, zot ti ariv sen e sof an Zerizalenm. Eski sa pa i montre nou ki Zeova i kapab protez bann ki annan konfyans dan li?