MƆGƆ 50 000 ɲɔgɔn bɔra Babilɔni ka tagamajan kɛ ka kɔsegi Zeruzalɛmu. Nka, u sera yen tuma min na, u y’a ye ko Zeruzalɛmu halakinin lakolon lo. Israɛldenw ka kan ka fɛɛn bɛɛ lɔ kokura.

U ye fɛɛn fɔlɔ minw lɔ, u la dɔ ye sarakabɔlan ye walisa ka bɛgɛnw saraka Jehova ye. Kalo damanin o kɔ, u y’a daminɛ ka Alabatosoba lɔ. Nka, u jugu minw siginin be u gɛrɛfɛ duguw la, olu b’a fɛ k’u bali k’o soo lɔ. O kama, u y’a ɲini k’u lasiran walisa u ka baara nin lalɔ. A laban, u ye Pɛrɛsi masacɛ kura lasun a ye sariya sigi walisa k’o baara lasa.

Saan caaman tɛmɛna. A saan 17 filɛ nin ye kabi Israɛldenw bɔra Babilɔni ka na. Jehova ye a ka kiraw Aze ni Zakari ci ka n’a fɔ jama ye k’u ka batosoba lɔli baara daminɛ tugun. Jama y’a jigi la Ala ka dɛmɛ kan ani u ye mɛnni kɛ kiraw fɛ. U y’a daminɛ ka lɔli kɛ kokura hali ni sariya dɔ tun b’u bali k’o kɛ.

O kama, Pɛrɛsi masacɛ ka lasigiden min tɔgɔ ko Tatinayi, ale nana Israɛldenw ɲininga ko jɔn lo ye sira di u ma ka Alabatosoba lɔ. Israɛldenw y’a fɔ a ye ko, k’u to Babilɔni, masacɛ Sirusi y’a fɔ u ye ko: ‘Sisan, aw ye taga Zeruzalɛmu, ani a’ ye aw ka Ala Jehova ka batosoba lɔ.’

Sirusi tun tɛ yen tugun, a tun sara. Tatinayi ye lɛtɛrɛ ci Babilɔni k’a ɲini k’a lɔn ni Sirusi tun y’o kuma fɔ tiɲɛn na. A ma mɛɛn, Pɛrɛsi masacɛ kura y’o lɛtɛrɛ kɔjaabi di. A ko Sirusi tun y’o kuma fɔ tiɲɛn na. O la, masacɛ y’a sɛbɛ ko: ‘A to Israɛldenw k’u ka Ala ka batosoba lɔ. Ani, ne be cii di aw ma ko aw k’u dɛmɛ.’ Alabatosoba lɔra ka ban saan naani ɲɔgɔn kɔnɔ, ani Israɛldenw ninsɔndiyara kosɔbɛ.

Saan caaman wɛrɛw tɛmɛna. A saan 48 ɲɔgɔn tun ye nin ye Alabatosoba lɔra ka ban. Zeruzalɛmukaw tun ye fantanw ye, Zeruzalɛmu dugu ani Alabatosoba tun filɛ man di. K’a to Babilɔni, Israɛlden Ɛsidirasi y’a mɛn ko Alabatosoba tun ka kan ka masiri. O kama, i y’a lɔn a ye min kɛ wa?

Ɛsidirasi tagara bɔ Pɛrɛsi masacɛ Aritasɛrisɛsi fɛ. O masacɛ ɲuman ye bonyafɛn caaman di Ɛsidirasi ma a ka taga n’u ye Zeruzalɛmu. Israɛlden minw tun be Babilɔni, Ɛsidirasi y’a ɲini u fɛ u k’ale dɛmɛ ka taga n’o bonyafɛnw ye Zeruzalɛmu. Mɔgɔ 6 000 ɲɔgɔn ko u bena taga n’a ye. O mɔgɔw tun ka kan ka warigwɛ ni sanu caaman ani fɛɛn nafamanba wɛrɛw doni ka taga n’u ye.

Hami tun be Ɛsidirasi la, sabu mɔgɔ juguw tun be sira kan. O mɔgɔw tun be se k’u ka warigwɛ n’u ka sanu bɔsi u la ani k’u faga. O kama, Ɛsidirasi ye jama lajɛn ɲɔgɔn kan i ko i ɲɛɛ b’a la jaa nin kan. O kɔ, u ye Jehova deli walisa a k’u tanga u ka tagamajan na ka kɔsegi Zeruzalɛmu.

Jehova y’u tanga. U ye kalo naani kɛ tagama na, o kɔ, u sera Zeruzalɛmu hɛɛrɛ la. Yala nin t’a yira ko mɔgɔ minw b’u jigi la Jehova kan, a be se k’u tanga wa?