Kukwe kira 81

Tö ngwani kwetre Ngöböi

NITRE kwati krubäte käkwe nänbare mente Babilonia nemen Jerusalén. Akwa niaratre namani aune, Jerusalén yekänti kä nämene ngwarbe. Yete ni ñaka nämene nüne jire. Jondron jökrä namani sribedreta mrä nitre Israel ie.

Käne kä sribebare kwetre jondron kukwakrä Ngöböi. Kä yekänti jondron nire kämikani bian nämene kukwadre Jehovai. Sö nikani braibe ta, ye bitikäre nitre Israel sribi kömikani templo sribekäre. Akwa nitre rüere nünanka juta bäre ta känti ye tönamani ngwain nikenkä ne kwe ñaka rabadre sribi ye nuainne. Mrä mada, nitre rüere käkwe rei mrä Persia töi mikani kukwe ükete sribi ye ötakäre.

Kä nikani kabre ta. Nitre Israel nämene Babilonia nükaninta, ye bitikäre kä nikani 17 ta. Nitre sribi ye kömikadre ju ye sribekäreta, ye Ngöbökwe profeta kwe Ageo bätä Zacarías juani niere ietre. Ngöbö niaratre dimikai ie tö ngwani kwetre yebätä mikani täte kwetre. Kukwe keteiti käkwe sribi ye ñäkäibare akwa niaratre käkwe nuainbare.

Yebätä, ni sribikä ütiäte persa kädeka nämene Tattenay jatani aune ngwanintari kwe, nirekwe templo ye sribe manabare. Nitre Israel niebare ie, Ciro rei Babilonia käkwe niebare: ‘Nän Jerusalén aune munkwe templo Jehovakwe ye sribe.’

Tattenay tärä juani keteiti Babilonia aune Ciro krütanina akwa kukwe ye niebare metre kwe abokän ngwanintari kwe. Jötrö ngwarbe rei mrä Persia käkwe tärä juani. Jän niebare kwe. Yebätä rei käkwe tikani: ‘Nitre Israel ye tuenmetre templo sribere Ngöbö kwetre kräke. Aune mun rika niaratre dimike.’ Kä kobokä te templo ye namani bare aune nitre Israel yebätä kä namani juto krubäte.

Kä nikani kwati krubäte ta. Templo namani bare ye bitikäre kä nikani 48 bäsi ta. Nitre Jerusalén nämene nüne bobre, aune juta bätä templo Ngöbökwe ñaka nämene tuin bä nuäre. Esdras ni Israel nämene Babilonia aune, templo Ngöbökwe ükadreteta ye ütiäte namani gare ie. Yebätä, ¿dre nuainbare kwe gare mäi?

Esdras nikani Artajerjes, rei Persia känti, aune rei töi kwin ye käkwe jondron biani ere Esdras ie ngwandre Jerusalén. Nitre Israel nämene Babilonia ye ie Esdras ja di käräbare, aune nitre 6.000 näin niebare kwetre. Ngwian, oro bätä jondron mada ütiäte jänikani ere kwetre.

Esdras namani töbike krubäte, nitre käme nämene ji ngrabare yebätä. Nitre ye raba ngwian bätä oro kwetre ye denkä kän aune kämike. Yebätä Esdras nitre ükaninkrö, tä bämikani ye erere. Biti orabare kwe Jehovai, ne kwe rabadre kriemike ji ngrabare nänkäreta nemen Jerusalén.

Jehová kriemikani. Nänbare sö kräbokä kwetre, aune mrä namanintre kwin Jerusalén. Kukwe ne tä mike gare nie, nire tä tö ngwen Jehovai ye niara raba kriemike, ¿ñan ererea?

Esdras kapitulo 2-8.