LINIBO ka tao ang naglakbay sing malawig gikan sa Babilonia pa Jerusalem. Apang sang pag-abot nila, guba gid ang Jerusalem. Dapat patindugon liwat sang mga Israelinhon ang tanan.

Ang nahauna nga ginpatindog nila amo ang altar. Nian ginsugdan nila ang pagtukod sing templo. Apang ang mga kaaway sa malapit nagpahog sa mga Israelinhon agod pauntaton sila. Sang ulihi ining mga kaaway nakapahimu sing sugo sa pagpauntat sang pagtukod.

Nagligad ang tinuig. 17 ka tuig sang makabalik ang mga Israelinhon gikan sa Babilonia, ginpadala ni Jehova ang iya manalagna nga sanday Hageo kag Zacarias agod sugiran ang kataohan nga sugdan ang pagpatindog liwat. Nagsalig ang kataohan kay Jehova, kag nagsugod liwat sa pagtukod sing templo.

Gani, ang Persianhon nga opisyal nga si Tatnai nag-abot kag namangkot sa ila kon ano ang kinamatarong nila sa pagtukod sing templo. Nagsiling ang mga Israelinhon nga sang sa Babilonia pa sila, si Hari Ciro nagsiling sa ila: ‘Lakat kamo karon, sa Jerusalem kag tukora ang templo ni Jehova, nga inyo Dios.’

Nagsulat si Tatnai sa Babilonia kag namangkot kon si Ciro, nga patay na, nagsiling gid sina. Ang bag-ong hari sang Persia nagbalos. Nagsiling sia nga si Ciro nagsiling sina. Ginsilingan man niya si Tatnai nga buligan ang mga Israelinhon sa pagtukod sang ila templo. Nahuman ang templo sing mga apat ka tuig.

Madamu pa nga tuig ang nagligad. Halos 48 ka tuig na karon kutob sang mahuman ang templo. Ang kataohan sa Jerusalem imol, kag ang siudad kag ang templo sang Dios indi matahom. Didto sa Babilonia, nadunggan sang Israelinhon nga si Esdras ang kinahanglanon nga kay-uhon ang templo sang Dios.

Gani, nagkadto si Esdras kay Artajerjes, nga hari sang Persia, kag ining maayong hari nagpadala kay Esdras sing madamung dulot pa Jerusalem. Nian, mga 6,000 ka Israelinhon ang nagsiling nga buligan nila si Esdras sa pagdala sining dulot pa Jerusalem.

Madamu sila sing dalal-on nga pilak kag bulawan kag iban pa hamiling mga butang. Gani gintipon ni Esdras ang kataohan, subong makita mo sa sining laragway. Nangamuyo sila kay Jehova nga amligan sila gikan sa malain nga mga tao sa ila malawig nga paglakbay pa Jerusalem.

Gin-amligan sila ni Jehova. Pagligad sing apat ka bulan nga paglakbay, nag-abot sila sa Jerusalem. Wala bala ini nagapakita nga ginaamligan ni Jehova ang nagasalig sa iya sing bulig?