INUIT tuusintilippassuit Babylonimit Jerusalemimut angalanermut sivisuumut ilaapput. Apuummatali Jerusalem illukuinnaavoq. Inoqanngilaq. Israelikkut suut tamaasa aallaqqaataanit qarmaqqittariaqarpaat.

Siullermik tunisiviliorput. Tassani uumasunik Jehovamut pilliuteqarsinnaapput, imaappoq tunisisinnaapput. Qaammatit arlaqanngitsut kingornagut Israelikkut naalaffik qarmalerpaat. Akeqqalli nunani qanittuni najugaqartut Israelikkut naalaffilioqqunngilaat. Taamaattumik sioorasaarpaat qarmaajunnaarsinniarlugit. Kiisalu akeqqat taakkua Persiap kunngia nutaaq inatsisiliortippaat naalaffiliorneq inerteqqutigeqqullugu.

Ukiut ingerlapput. Ukiut 17-it qaangiupput Israelikkut Babylonimit uterneranniit. Jehovap pruffiitini Haggaj Zakariasilu aallartippai inuit peqqujartoqqullugit sanaqqilernissaannik. Inuit Guutip ikiuinissaa tatigaat, pruffiitillu naalallugit. Sanaqqilerput, naak taamaaliornissamut inerteqqutaasumik inatsiseqaraluartoq.

Taava atorfikkaaq Persiamiu Tattenajimik atilik tikiuppoq Israelikkullu aperalugit naalaffiliornermut pisinnaatitaanersut. Israelikkut oqaluttuuppaat Babylonimiikkallaramik kunngip Kyrosip ima peqqusimagaatik: ’Jerusalemimut aallaritsi Guutissilu Jehovap naalaffia qarmaqqillugu.’

Tattenaj Babylonimut allakkanik allappoq apeqqutigalugu Kyros maanna toqoreersimasoq ilumut taamatut oqarsimanersoq. Erniinnaq Persiap kunngiata nutaap allagai takkupput. Allassimavoq Kyros ilumut taama oqarsimasoq. Taamaattumillu kunngi allappoq: ’Israelikkut Guutimik naalaffia sanalissuk. Peqquakkillu ikioqqullugit.’ Ukiut sisamangajaat qaangiummata naalaffik inerneqarpoq, Israelikkullu nuannaaqaat.

Ukiorpassuit ingerlapput. Ukiut 48-ngajaat qaangiupput naalaffiup inerneqarneraniit. Inuit Jerusalemimiut piitsuupput, illoqarfillu naalaffillu kusanaallisimaqaat. Babylonimi Israelikkuusup Esrap tusarpaa Guutip naalaffia iluarsarneqartariaqalersimasoq. Qanoq iliuuseqartoq nalunngiliuk?

Esra Persiap kunngianut Artaxerxesimut sassarpoq, kunngillu ajunngitsup taassuma Esra tunissuterpassuarnik Jerusalemimut nassatassaanik tunivaa. Esrap Babylonimi Israelikkut qinnuigai ikioqqulluni tunissutit taakku Jerusalemimut assartornissaannut. Inuit 6000-ngajaat oqarput ikiuukkumallutik. Siilvit kuultillu erlinnartorpassuillu allat assartussavaat.

Esra isumakuluppoq aqqutissaminni ajortunik inoqarmat. Inuit taakkua immaqa siilvit kuultillu tigussavaat, inuillu toqullugit. Taava Esrap inuit katersortippai, soorlu assilissami takusinnaagit. Taava Jehovamut qinupput sernigeqqullutik.

Jehovap sernissorpai. Qaammatillu sisamat angalareerlutik Jerusalemimut apuulluarput. Tamatuma takutinnginnerpaa Jehovap imminut tatiginnittut sernissorsinnaagai?