BANTU nobe 50,000 baendele lwendo lwalepa kufuma mu Babilona kuya ku Yelusalema. Bino byo bafikile, bataine Yelusalema waonaunwa pakatampe. Kafwako baikalangamo ne. Bena Isalela bafwainwe kushimika byonse jibiji.

Kintu kitanshi kyo batungile kyajinga kya kusokelapo bitapisho. Aye yo mpunzha yo bashimikile ya kulambwilapo banyama, nangwa kupainapo bupe kwi Yehoba. Papichiletu bañondo bacheche bena Isalela batendekele kushimika nzubo ya Lesa. Bino balwanyi baikelenga kwipi na kyokya kyalo kechi bakebelenga bena Isalela kushimika ne. Onkao mambo batendekele kwibachinya amba baleke kushimika. Kyapeleleko, abano balwanyi baishile kwikala na mfumu mupya wa Pelisha ye bakebele’mba abikeko muzhilo wa kukanya mwingilo wa kushimika.

Papichile myaka 17 kufuma kimye bena Isalela kyo babwelelemo kufuma ku Babilona. Yehoba watumine bangauzhi banji ba Hagai ne Zekaliya amba baye na kwambila bantu amba batendeke kushimika jibiji. Bantu baketekejile mu bukwasho bwa Lesa, ne kumvwina bangauzhi. Bantu batendekele kushimika jibiji nangwa kya kuba muzhilo wibakainye.

Onkao mambo ndamakyalo wajinga na jizhina ja Tatenai wa mu Pelisha waishile na kwipuzha bena Isalela ko bafumishe lūsa pa kuba’mba batunge nzubo ya Lesa. Bena Isalela bamwambijile amba byo twajinga mu Babilona, Mfumu Kilusa witwambijile’mba: ‘Yainga, lonkaluno, ku Yelusalema mukashimike nzubo ya Yehoba, Lesa wenu.’

Tatenai watumine nkalata ku Babilona na kwipuzha inge Kilusa wafwile kala byo byo aambile. Kechi papichile nangwa kimye ne, nkalata yafumine ku mfumu mupya wa Pelisha. Yaambile’mba Kilusa byo byo aambile. Ne mfumu wanembele’mba: ‘Lekai bena Isalela bashimike nzubo ya Lesa wabo. Ne obewa na kukambizha’mba wibakwasheko.’ Mu myaka ina nzubo ya Lesa yapwile, ne bena Isalela batemenwe bingi.

Myaka yavula yapichilepo. Papichile myaka nobe 48 kufuma papwijile nzubo ya Lesa. Bantu mu Yelusalema bayanjile, kabiji muzhi ne nzubo ya Lesa byalekele kumwekana bulongo. Kubwela mu Babilona, Ezela mwina Isalela waumvwine pa bya kushimika nzubo ya Lesa. Nanchi wayuka byo aubile nyi?

Ezela wayile nakumona Atazakeshi, mfumu wa mu Pelisha, ne uno mfumu wawamine bingi wapele Ezela bupe bwa kuya nabo ku Yelusalema. Ezela waipwizhe bena Isalela mu Babilona amba bamukwasheko kusenda bupe ku Yelusalema. Bantu 6,000 baambile’mba babena kuya nanji. Bajinga na bintu byavula bya kusenda nobe siliva ne ngolode ne bintutu bikwabo bya buneme byo basendele.

Ezela waakaminwe, mambo mu mukwakwa mo bailenga mwajinga bantu batama. Abano bantu inge bebangachile siliva ne ngolode yabo, ne kwibepaya. Onkao mambo Ezela waichile bantu bonse pamo, byonka byo wamona pa kikye kipikichala. Kabiji balombele kwi Yehoba amba ebazhikijile pa lwendo lwa kubwela ku Yelusalema.

Yehoba wibazhikijiile. Bañondo bana bo baendele, bafikiletu bulongo mu Yelusalema. Nanchi kino kechi kimwesha kuba’mba Yehoba wakonsha kuzhikijila boba baketekela mu bukwasho bwanji nenyi?