ပူ ၈၁
တၢ်ပာ်ဂံၢ်ပာ်ဘါဒီးတၢ်နာ် ယွၤအတၢ်မၤစၢၤ အဂ့ၢ်
ပှၤလၢအကထိတဖၣ် ဟးထီၣ်လၢဘၤဘူၤလိၣ် ဒီးလဲၤဝဲတၢ်လဲၤဖးထီဆူ ဝ့ၢ်ယရူၤၡလ့ၣ်န့ၣ်လီၤ. ဘၣ်ဆၣ် ဖဲအဝဲသ့ၣ်ဟဲက့ၤတုၤဝဲအခါ ထံၣ်ဘၣ်ဝဲသ့ၣ် ဝ့ၢ်ယရူၤၡလ့ၣ်န့ၣ် အိၣ်ဒီးတၢ်ဟးဂုာ်ဟးဂီၤ နးနးကလဲာ်န့ၣ်လီၤ. ပှၤတအိၣ်နီတဂၤဘၣ်. ပှၤအံၣ်စရ့လးဖိတဖၣ် ဘၣ်သူၣ်ထီၣ်က့ၤ တၢ်ကိးမံၤဒဲး လၢအခီၣ်ထံးန့ၣ်လီၤ.
တၢ်လၢအဝဲသ့ၣ် စးထီၣ်သူၣ်ထီၣ်အဆိကတၢၢ်တခါန့ၣ် တၢ်လုၢ်လီၢ်တခါန့ၣ်လီၤ. တၢ်လၢတၢ်လုၢ်လီၢ်စံးတၢ်န့ၣ် မ့ၢ်တၢ်လီၢ်လၢ တၢ်လုၢ်ထီၣ်ယဟိဝၤလၢ ဆၣ်ဖိကီၢ်ဖိ မ့တမ့ၢ်, တၢ်ဟ့ၣ်ခိၣ်ဖးအလီၢ်န့ၣ်လီၤ. ပူၤကွံာ်စှၤလါဝံၤအလီၢ်ခံ ပှၤအံၣ်စရ့လးဖိတဖၣ် စးထီၣ်သူၣ်ထီၣ်တၢ်လုၢ်ဟံၣ်န့ၣ်လီၤ. ဘၣ်ဆၣ်သနာ်က့ ဒုၣ်ဒါလၢအဃိၣ်အဃၢၤတဖၣ် တအဲၣ်ဒိးလၢ ပှၤအံၣ်စရ့လးဖိကသူၣ်ထီၣ်တၢ်ဒ်အံၤန့ၣ်ဘၣ်. လၢတၢ်န့ၣ်အဃိ ဒ်သိးအသုတသူၣ်ထီၣ်လၢၤတဂ့ၤအဂီၢ် ကတိၤပျံၤကတိၤဖုးအဝဲသ့ၣ်လီၤ. လၢခံကတၢၢ်န့ၣ် ဒုၣ်ဒါတဖၣ်အံၤ ကတိၤခဲၣ်ဝဲပှၤအံၣ်စရ့လးဖိအဂ့ၢ်လၢ ပၤရၣ်အစီၤပၤလၢအထီၣ်အသီ ဒ်သိးကထုးထီၣ်တၢ်သိၣ်တၢ်သီလၢ ကဆိကတီၢ်ကွံာ်တၢ်သူၣ် ထီၣ်အံၤန့ၣ်လီၤ.
နံၣ်တဖၣ်, ကတီၢ်တဖၣ်လဲၤပူၤကွံာ်လံလီၤ. ပှၤအံၣ်စရ့လးဖိတဖၣ် ဟးထီၣ်လၢ ဘၤဘူၤလိၣ်န့ၣ်အိၣ် ၁၇ နံၣ်လံ. ယဟိဝၤမၢလီၤ ဝံဃးကဲဒီးစကၤရယၤ ဒ်သိးကထိၣ်ဟူးထိၣ်ဂဲၤထီၣ်က့ၤ ပှၤအံၣ်စရ့လးဖိလၢ ကသးအိၣ်သူၣ်ထီၣ်က့ၤ တၢ်လုၢ်ဟံၣ်အဂီၢ်န့ၣ်လီၤ. ပှၤတဖၣ်အံၤ နာ်ဝဲဒီးပာ်ဂံၢ်ပာ်ဘါဝဲ ယွၤအတၢ်မၤစၢၤအဃိ ဒိကနၣ်ဝံသ့ၣ်တဖၣ်အတၢ်ကတိၤန့ၣ်လီၤ. တၢ်သိၣ်တၢ်သီ တြီလၢတဘၣ်သူၣ်ထီၣ်တဂ့ၤသနာ်က့ သူၣ်ထီၣ်က့ၤဝဲသ့ၣ်န့ၣ်လီၤ.
လၢတၢ်န့ၣ်အဃိ တးနဲ လၢအမ့ၢ်ပၤရၣ်အခိၣ်အနၢ်တဂၤဟဲဒီး သံကွၢ်ဝဲဒၣ်ပှၤအံၣ်စရ့လးဖိသ့ၣ်တဖၣ်လၢ သုသူၣ်ထီၣ်တၢ်အံၤလၢ မ့ၢ်မတၤဟ့ၣ်စိဟ့ၣ်ကမီၤသုအဃိန့ၣ်လဲၣ် န့ၣ်လီၤ. ပှၤအံၣ်စရ့လးဖိတဖၣ်စံးဘၣ်က့ၤအီၤလၢ ဖဲအဝဲသ့ၣ်အိၣ်လၢ ကီၢ်ဘၤဘူၤလိၣ်အခါ စီၤပၤကိရ့ၣ်စံးအဝဲသ့ၣ်လၢ, ‘လဲၤဆူဝ့ၢ်ယရူၤၡလ့ၣ် ဒီးသူၣ်ထီၣ်က့ၤ သုကစၢ်ယွၤယဟိဝၤအတၢ်လုၢ်ဟံၣ်တက့ၢ်’ န့ၣ်လီၤ.
တုၤနုၤတစု, တးနဲကွဲးလံာ်ဆူ ဘၤဘူၤလိၣ်ဒီးသံကွၢ်ဝဲ စီၤပၤကိရ့ၣ်လၢအသံလံန့ၣ် ဟ့ၣ်လီၤတ့ၢ်ဝဲအကလုၢ် နီၢ်နီၢ်ဧါန့ၣ်လီၤ. တယံာ်ဘၣ်ဒီး လံာ်ဟဲက့ၤကဒါလၢ ပၤရၣ်စီၤပၤအသီအအိၣ်လီၤ. စံးဝဲဒၣ်လၢ စီၤပၤကိရ့ၣ်တဲတ့ၢ်ဝဲနီၢ်နီၢ်န့ၣ်လီၤ. ထဲန့ၢ်တဝံၤဒံးဘၣ်. စံးဝဲစ့ၢ်ကီးလၢ ‘ပှၤအံၣ်စရ့လးဖိတဖၣ် မ်အကသူၣ်ထီၣ်အယွၤ အတၢ်လုၢ်ဟံၣ်န့ၣ်တက့ၢ်. ယခါလီၤနၤယကလုၢ်လၢ နကဘၣ်မၤစၢၤအဝဲသ့ၣ်န့ၣ်လီၤ.’ လွံၢ်နံၣ်ပူၤကွံာ်ဝံၤဒီး တၢ်လုၢ်ဟံၣ်ဝံၤလီၤ. ပှၤအံၣ်စရ့လးဖိတဖၣ်စ့ၢ်ကီး သးခုဝဲသ့ၣ်ဒိၣ်မးန့ၣ်လီၤ.
တၢ်ဆၢကတီၢ်လဲၤပူၤကွံာ် ယံာ်မးလံ. တၢ်သူၣ်ထီၣ်တၢ်လုၢ်ဟံၣ်ဝံၤ အိၣ် ၄၈ နံၣ်ညါန့ၣ်လံ. ပှၤအိၣ်ဝဲဆိးဝဲလၢယရူၤၡလ့ၣ်ပူၤတဖၣ် ဖှီၣ်ဝဲဒိၣ်မးန့ၣ်လီၤ. လၢတၢ်န့ၣ်အဃိ ဝ့ၢ်ဒီးယွၤအတၢ်လုၢ်ဟံၣ်န့ၣ် တဂ့ၤဒီးတဃံလၤဝဲဘၣ်န့ၣ်လီၤ. ယွၤအတၢ်လုၢ်ဟံၣ်န့ၣ် အလီၢ်အိၣ်လၢ ကဘၣ်တၢ်ကယၢကယဲထီၣ်က့ၤ အဂ့ၢ်န့ၣ် ပှၤအံၣ်စရ့လးဖိဧ့စြၤ လၢအအိၣ်တ့ၢ်လၢဘၤဘူၤလိၣ် သ့ၣ်ညါဝဲန့ၣ်လီၤ. ထဲန့ၣ်ဒီး မၤဝဲဒ်လဲၣ်န့ၣ် သုသ့ၣ်ညါဧါ.
ဧ့စြၤလဲၤထံၣ်ဝဲဒၣ် ပၤရၣ်အစီၤပၤ အၢ်တၤၡါၡတၤန့ၣ်လီၤ. စီၤပၤလၢအဂ့ၤအံၤ ဟ့ၣ်လီၤဝဲဒၣ်ဧ့စြၤတၢ်ဟ့ၣ်အါမး လၢကက့ၤစိာ်ဝဲဒၣ်ဆူဝ့ၢ်ယရူၤၡလ့ၣ်န့ၣ်လီၤ. ဧ့စြၤဃ့တၢ်မၤစၢၤလၢ ပှၤအံၣ်စရ့လးဖိလၢဘၤဘူၤလိၣ်တဖၣ် ကက့ၤစိာ်စၢၤအီၤ တၢ်ဟ့ၣ်တဖၣ်အံၤဆူ ယရူၤၡလ့ၣ်န့ၣ်လီၤ. ပှၤ ၆,၀၀၀ စံးဝဲလၢကလဲၤဝဲန့ၣ်လီၤ. အဝဲသ့ၣ်ကဘၣ်လဲၤစိာ်ဝဲ ထူတဖၣ်ဒီး တၢ်လုၢ်ဒိၣ်ပှ့ၤဒိၣ်တဖၣ် အိၣ်အါမးန့ၣ်လီၤ.
ဧ့စြၤသးကိၢ်ဝဲလၢ ပှၤအၢပှၤသီတဖၣ် အိၣ်လၢကျဲအဃိန့ၣ်လီၤ. တမျာ်တဖၣ် ဂုာ်န့ၢ်အဝဲသ့ၣ်အထူတဖၣ်ဒီး မၤသံအဝဲသ့ၣ်သ့လီၤ. လၢတၢ်န့ၣ်အဃိ ဧ့စြၤစုးဖှိၣ်ရိဖှိၣ်ပှၤတဖၣ် ဒ်ပထံၣ်အီၤလၢတၢ်ဂီၤအံၤအပူၤအသိးန့ၣ်လီၤ. ဝံၤဒီးဃ့ဘါထုကဖၣ်ယဟိဝၤယွၤ ဒ်သိးကကဟုဘံၣ်ကယာ်ဘၢအဝဲသ့ၣ်လၢ အက့ၤဝဲသ့ၣ်ဆူ ယရူၤၡလ့ၣ်အခါန့ၣ်လီၤ.
ယဟိဝၤကဟုဘံၣ်ကယာ်ဘၢ အဝဲသ့ၣ်နီၢ်နီၢ်လီၤ. ဖဲအလဲၤတၢ်ယံာ်လွံၢ်လါအခါ လဲၤတုၤဝဲသ့ၣ်ဆူဝ့ၢ်ယရူၤၡလ့ၣ် မုာ်မုာ်ခုၣ်ခုၣ်န့ၣ်လီၤ. တၢ်အံၤပာ်ဖျါထီၣ် ယဟိဝၤမၤစၢၤ ပှၤလၢအပာ်ဂံၢ်ပာ်ဘါအသးဒီးအီၤသ့လီၤ တမ့ၢ်ဘၣ်ဧါ.
