KONYARA vantu wokusika po-50 000 vana zi morugendo rorure rokutunda koBabironi va ze koJerusarema. Nye apa vana ya siki, Jerusarema kuna kara po tupu mapuku. Kwato ogu ana tungu mo. Vaisraeli va kona kutungurura nayinye hena.

Sininke simwe somuhowo esi vana tungu kuna kara sizambero. Eli kuna kara evango apa nava vhulira kuzambera Jehova nonzambo doyikorama ndi mauhwi. Konyima zomakwedi gongandi Vaisraeli tava tameke kutunga ntembeli. Nye nonkore edi da tunga moyirongo yopopepi kapi dina hara asi Vaisraeli va tunge ntembeli. Makura tava heteke kuvatjilisa asi va hageke. Mouhura, nonkore edi tadi ya ninki hompa gwaPeresiya gomupe a ture po veta zokuhagekesa yirugana yetungo.

Nomvhura tadi piti. Ngesi pana piti nye nomvhura 17 kutunda apa va ka tengwire Vaisraeli koBabironi. Jehova ta tumu vaporofete vendi oHagayi naSakaliya va tantere vantu va tameke kutunga hena. Vantu tava huguvara mevatero lyaKarunga, makura tava limburukwa vaporofete. Tava tameke hena kutunga nampili ngomu veta zina kutanta asi va ha yi rugana.

Mupangeli goMuperesiya gedina Tatenayi ta wiza nokupura Vaisraeli asi uhunga musinke va kara nawo wokutunga ntembeli. Vaisraeli tava mu tantere asi apa va kere moBabironi, hompa Koresi kwa va tanterere asi: ‘Zendeni koJerusarema mu ka tunge ntembeli zaJehova, Karunga gweni.’

Tatenayi ta tumu mbilive koBabironi nokupura asi nsene nawa-nawa Koresi, ogu ga kere poruveze oru age ana fu, ga yi tente eyi. Nosiruwo si mbilive zokutunda kwahompa gwaPeresiya gomupe tazi ka tengura. Azo tazi tanta asi yosili Koresi ga yi tente. Hompa kwa tjanga asi: ‘Sigeni Vaisraeli va tunge ntembeli zaKarunga gwawo. Ano ame kuna kugava mpangera asi mu va kwafe.’ Monomvhura dokusika pwane ntembeli tazi pu kuzitunga, ano Vaisraeli vana hafa unene.

Nomvhura dononzi tadi piti po. Tadi siki poyiha yonomvhura 48 kutunda apa va mene ntembeli. Vantu womoJerusarema nohepwe, ano sitata nontembeli zaKarunga kapi ngayi moneka ufuuli unene. MoBabironi, Muisraeli gumwe gedina Esira ta zuvhu kuhamena hepero zokuwapukurura ntembeli zaKarunga. Ono diva asi yinke ana rugana?

Esira ta zi kwaAretaserekesesi, hompa gwaPeresiya, ano hompa ogu gomuwa ta pe Esira mauhwi gomanzi a tware koJerusarema. Esira ta pura Vaisraeli moBabironi va mu vatere mokutwara mauhwi aga koJerusarema. Vantu wokusika poyiha yo-6 000 tava pura asi tava zi. Awo kuna kara noyininke yoyinzi yokusimba ngwendi sisiliveli nongorodo ntani noyininke yimwe hena yondiro.

Esira ta kara nosinka morwa monzira kwa kara mo vantu wovadona. Vantu ava kuvhura kuvahokona sisiliveli nongorodo zawo nokuvadipaga. Esira makura ta zigida vantu va ponge, ngomu ono kuyimona mefano. Makura tava kanderere kwaJehova a va popere morugendo rwawo rorure va tengure koJerusarema.

Jehova ta va popere. Ano konyima zomakwedi gane gokugenda, tava ya siki moJerusarema awo vandjewa-ndjewa. Nani eyi kapi yina kulikida asi Jehova kupopera owo ava mu huguvara?

Esira magaununo 2 dogoro 8.