TEZO kia 50.000 ma wantu bavanga nkangalu anda mu vutuka kuna Yerusaleme. Vava balwaka, Yerusaleme futa kiankatu kiasala. Ke mwazingilanga muntu ko. Aneyisaele bafwete tungulula lekwa yawonso.

Eziku, i lekwa kiantete batunga. I fulu bakelelanga yimenga ya bulu yo futumwina tukau kwa Yave. Ke vavioka ngonde zayingi ko Aneyisaele bayantika tunga e tempelo. Kansi, atantu muna nsi zabafinama ke bazola ko vo Aneyisaele batunga e mbanza. Ozevo, bavavidi kubavumisa bayambula tunga. Oku kwalanda, bafilakesa ntinu ampa a Parasa kasia nsiku waningamesa e ntunga yayi.

Kolo kiayingi kiavioka. Owau se mvu 17 tuka Aneyisaele bavaikila kuna Babele. Yave otumini Kangai yo Zakariya wa ngunza mu vovesa nkangu vo bayantika diaka o tunga. Nkangu wabunda vuvu muna lusadisu lwa Nzambi balemvokela angunza yo yantika tunga kana una vo o nsiku wavovanga vo ke bafwete wo vanga ko.

E ntangwa ina, o Tatenai wa mfumu a makesa ma Parasa wizidi yo yuvula Aneyisaele kana mu nswa anani betungilanga e tempelo. Aneyisaele bamvutwidi vo vava bakala kuna Babele Kurese wa ntinu wabavovesa vo: ‘Lwenda kuna Yerusaleme nutungila Yave wa Nzambi eno e tempelo.’

O Tatenai osonekene nkanda kuna Babele mu zaya eziku vo o Kurese ona wafwa yandi kieleka wavana nswa wau. Ke kolo ko, ntinu ampa a Parasa untwikidi nkanda, oku vo, Kurese kikilu wabavana nswa wau. Osonekene vo: ‘Yambula Aneyisaele batunga tempelo ya Nzambi au. Ikanikini vo wabasadisa.’ Ozevo, e tempelo yamanisa tungwa mu tezo kia mvu nya, Aneyisaele bayangalala kikulu.

Se mvu 48 tuka kiamanina tunga e tempelo. Nkangu muna Yerusaleme asukami kikilu, e mbanza ye tempelo ke yakala yavienga ko. O Ezera wa Nyisaele wakala kuna Babele owidi wo vo e tempelo a Nzambi sikidiswa ivava. Nga ozeye dina kavanga?

Ezera wele lomba lusadisu kwa Antakesate wa ntinu a Parasa. O ntinu ndioyo ambote ovene Ezera tukau twayingi mu nata kuna Yerusaleme. Ezera olombele kwa Aneyisaele bakala muna Babele bansadisa mu nata tukau toto kuna Yerusaleme. Tezo kia 6.000 batambulwila e mboka yayi. Bakala yo ulolo wa palata, wolo ye lekwa yakaka yamfunu mu nata.

Ezera omwene wonga kadi vena ye ulolo wa yimpumbulu muna nzila, balenda kubavonda yo baka palata ye wolo wau. Ozevo, Ezera obokele nkangu nze una omwene mu fwaniswa kiaki. Osambidi kwa Yave muna kubatanina mu nkangalu anda bevanga yakuna Yerusaleme.

O Yave wabatanina. Vioka ngonde yá batoma lwaka kuna Yerusaleme. Ediadi nga kedisonganga ko vo o Yave olenda tanina awana bekumbundanga e vuvu?