Icisimicisyo 81: Ukupemamo mu Kofwa kwa BaLesa
APEPI ne bantu 50,000 bapanga ulwendo lwa musinso uutali ulwa kufuma ku Babiloni ukuya ku Jelusalemi. Pano ili bafika, Jelusalemi alyonakile. Tapapo uwikalamo. AbaIsilaeli bali ne kwibaka fyonse lukoso ifya bukumo nakabili.
Cimo pa fibatatikilepo ukwibaka conto. Uyu mupunda bangapelelapo imilambu ya nama neli impese, kuli baYehoba. Ili papita imyensi inini abaIsilaeli batatikako ukwibaka itempuli. Pano abapate abekala mu fyalo fya pepi tabalukufwayapo ati abaIsilaeli balibake. Popele baesya ukubatiinya pakweba’ti baleke. Mukupelako, aba bapate baeba imfumu ya bukumo iya Pasai ukupange’funde lya kukanya ukwibake’tempuli.
Imyaka yapita. Pano myaka 17 ukufuma apo abaIsilaeli baisile ukufuma ku Babiloni. BaYehoba batuma abakusimika babo Agayi na Sakaliya ukubula abantu ukutatika ukwibaka nakabili. Abantu bapemamo mu kofwa kwa baLesa, kabili babomfwila abakusimika. Batatikako ukwibaka nakabili, nangaba’ti ifunde talilukubebapo ukucite’fyo.
Umwikalicisi wa Pasai uwe sina lya Tatenai aisa ne kwipusya abaIsilaeli uwabapa amakosa akwibaka itempuli. AbaIsilaeli bamubula ati ili baali mu Babiloni, Imfumu Kolesi yalibabulile ati: ‘Kamuya, pano, ku Jelusalemi kabili ne kwibake’tempuli lya baYehoba, baLesa wenu.’
Tatenai atume’mbaluba ku Babiloni mu kwipusya Kolesi, pali ino mpindi alifwile, ukubona kani muli bucine alilabile ayo’masiwi. Bwangubwangu imbaluba yabwela ukufuma ku mfumu ya Pasai iya bukumo. Kabili imfumu yalemba ati: ‘Lekeni abaIsilaeli bebake itempuli lya baLesa wabo. Kabili ndukumufundeni mwebo ati mubofwe.’ Apepi ne myaka sine itempuli lyasila, kabili ne baIsilaeli basangalala ukwakuti.
Imyaka iingi naimbi yapita. Pano imyaka yaba apepi na 48 ukufuma apo itempuli lyasilile. Abantu mu Jelusalemi bapenga, umusi ne tempuli lya baLesa tafilukubonekapo bwino. Mu Babiloni, umuIsilaeli Esila aisiba ukweba ati itempuli lya baLesa lilukufwaikwa ukuwamya. Pano kani waisiba ifi acita?
Esila aya mu kubona Alitacisyasiti, imfumu ya Pasai, kabili iyi imfumu iiweme yapela Esila ifya mpese ifingi ukufipinta ku Jelusalemi. Esila aeba abaIsilaeli mu Babiloni ukumofwa ukupinta ifya mpese ku Jelusalemi. Apepi ne bantu 6,000 balabila ati balukuya. Bali ne silifa ne golide na fimbi ifyakuti ubune ifyakupinta.
Esila abombomana, nipakuti muli abantu imbifi mu nsila. Aba bantu pambi bangabapokolola isilifa ne golide wabo, ne kubepaya. Eli Esila angeta abantu pamo, koti nififi wabona mu cikope. Batembela kuli baYehoba pakweba’ti babacingilile pa lwendo lwa musinso uutali ulwa kubwelela ku Jelusalemi.
BaYehoba babacingilila. Kabili panuma ya kwenda imyensi sine, bafika ku Jelusalemi. Kani ici tacilukutubula ati baYehoba balacingilila abo abapemamo muli bo ku kubofwa?
Esila ifyapitala 2 ukufika ku 8.
Ifyakwipusya
- Abantu abali pa lwendo ukufuma ku Babiloni ukuya ku Jelusalemi bali banga, pano findo basangana ili bafika?
- Findo abaIsilaeli batatika ukwibaka ili bafika, pano abapate babo bacite’ndo?
- Mba Agayi na Sakaliya nibani, kabili findo babula abantu?
- Nindo Tatenai atumina imbaluba ku Babiloni, kabili esa masiwi apokelela?
- Findo Esila acita ili aisiba palwa kuwamya itempuli lya baLesa?
- Cindo Esila alukutembelela mu cikope, itembelo lyakwe lyaasukwa syani, kabili ici cilukutusambisye’ndo?
Ifyakwipusya na fimbi
- Pendeni Esila 3:1-13.
Kani twalisangana ku mupunda uku takuli ikelesya lya bantu ba baLesa, cindo twelelwe ukutwalilila ukucita? (Esila 3:3, 6; Cit. 17:16, 17; Ebeya. 13:15)
- Pendeni Esila 4:1-7.
Cindo abapyungisi ba baYehoba bangasambililako kuli Selubabeli pa fyakusankanya ukupempela ukupusenepusene? (Fum. 34:12; 1 Kol. 15:33; 2 Kol. 6:14-17)
- Pendeni Esila 5:1-5, 17 na 6:1-22.
Mba nindo abalukukanya bafililwe ukucicila ukupyunga kwa kwibake’tempuli? (Esila 5:5; Yisa. 54:17)
Kani ifyacitile abakulu ba baJuda koti fyakosya syani baeluda ba buKlistu ili bali ne balukubakanya? (Esila 6:14; Amasa. 32:8; Loma. 8:31; Jako. 1:5)
- Pendeni Esila 8:21-23, 28-36.
Cindo Esila acitile icingawama ukutuntululako ili nafwebo tulukufwaya ukucite’cintu? (Esila 8:23; Amasa. 127:1; Ifisi.10:22; Jako. 4:13-15)
