KANÄK milë israelitë tsyoˈondë Babiloñʉ ets jyäjttë Jerusalén. Per ko jam jyäjttë, ta tˈijxtë ko të nety ja jëën tëjk wyindëgooytyaaynyë. Nipënë nety jam kyanekytsyëënë. Pääty ëxˈäjp jatëgok tyëjkëdë tuumbë.

Tim jawyiin yëˈë ojts tkojtë tuˈugë lugäär mä mbäät yox nyoˈoktë, ets mä ttukwintsëˈëgëdë jëyujk animalë Jyobaa. Ta ko waanë tiempë nyajxy ta ja israelitëty tkojtsondaktë ja Diosë tyëjk. Per ja myëgäjpnbäˈäjëty ta yˈaxëkˈijxëdë ets jyaˈatsëˈëgëyanëdë ets kyaj nyekytyundët. Ok ta ojts tˈanëëmëdë ja jembyë rey diˈib Persia ets tniˈanaˈamët ko kyaj tnekyyajpattët ja potsy.

Ja nety kujk nyaxy 17 jëmëjt mä israelitë tsyoondë Babiloñʉ, ko Jyobaa tkejxyë kyugajpxy diˈib xyëˈäjttë, Ajee ets Zakariiʉs ets tˈanëëmëdët ja israelitëty ko waˈan jatëgok tniwäˈägëdë ja potsy. Ja israelitëty mëdoodë ets myëbëjktë ko mbäädë Dios pyudëkëdë. Ta jatëgok tyëjkëdë tuumbë oyë nety ja anaˈamënë jyënaˈany ko kyaj tnekyyajpattët ja potsy.

Pääty tuˈugë soldäädë wintsën diˈib xyëˈäjt Tatenay myiiny ets dyajtëëjy ja israelitëty pënë nety të yˈanëˈëmxëdë ets tkojtët ja Diosë tyëjk. Ja israelitëty ta yˈatsoodë ko Siro yëˈë diˈib anmääyëdë ko jam yˈijttë Babiloñʉ: Nëjxtë Jerusalén ets kojtë Jyobaa tyëjk diˈib mDiosˈäjttëp.

Ja Tatenay ta tkejxy tuˈugë noky jam Babiloñʉ ets dyajtëëjy pën dëˈënë Siro jyantsy jënany. Pes ja Siro të nety yˈoˈknë. Ta ja jembyë rey diˈib Persia tkajxëmbijty ja noky ets jyënany: Tëyˈäjtënë, Siro dëˈën jyantsy jënany. Pääty naˈixtë israelitëty waˈan tkojtë Diosë tyëjk. Ets ndukˈanaˈamdëbëts miitsëty ets xypyudëkëdët. Ta kyum mäjtaxk jëmëjt yajkojˈabejty ja Diosë tyëjk, ets ja israelitë jotkujk jyantsy nyayjäˈäjëdë.

Ta nyajxy 48 jëmëjt mä netyë Diosë tyëjk të yajkojˈabety. Per ja käjpn ets ja Diosë tyëjk kyaj tsuj kyëxeˈeky, yëˈko ayoodëbë nety ja jäˈäy diˈib jam tsënääytyëp. Jam Babiloñʉ ta tnijäˈäjë Esdras ko tsojkëp ets ja Diosë tyëjk yˈoytyëkët. Pääty, ¿mnijäˈäp ti tyuun?

Yëˈë nyinëjx ja rey diˈib Persia diˈib xyëˈäjt Artajerjes. Tyäˈädë rey oyjyaˈay pääty tjantsy nyamoojy tijatyë Esdras ets tmënëjxët Jerusalén. Esdras ta tˈamdooyë naybyudëkë israelitëty diˈibë nety jam Babiloñʉ, ets tmënëjxtët tijatyë nety të yajnamoˈoy. Ets nidëdujk milë israelitë jyënandë ko nëjxandëp. Ta tmëtsoˈondë mayë oorë etsë platë.

Esdras ta jyotmaytyuktëjkë, yëˈko mbäät tuˈääyë axëkjäˈäy pyëjkxëdë oorë etsë platë, ets axtë mbäät yaˈoogëdë. Päätyë Esdras dyajnaymyujkë ja israelitëty extëm yam xyˈixy mä dibujë. Ta net tmënuˈkxtakyë Jyobaa ets kyuwäˈän kyunuˈxëdët nëˈën tyuˈuyoˈoyäˈändë.

Jyobaa ojts kyunuˈxëdë ets oy mëk jyäjttë Jerusalén kyum mäjtaxk poˈo. ¿Këdii yëˈë tyäˈädë xytyukˈijxëm ko Jyobaa mbäät tkuniˈxy pënaty mëbëjkëdëp?