Sturka 81

Gâd Helpka Ra Kasak Luki

UPLA tausin ailal Babilun wina Jerusalem ra impaki bangwan. Sakuna kli taui wan pyua ra, Jerusalem ba dan sauhkan kan. Upla kumi sin baha ra iwras kan. Israel uplika nani ba diara sut kli raya paskaia kan.

Witin nani diara pas daukan ba altar kum paskan. Naha ba Jehova ra daiwan nani prisantka yabaia pliska kum kan. Kati kum kum luan bara Israel uplika nani ba tempel ba paski ta krikan. Sakuna kuntri wala waihla nani bara kan ba mita, sirang ikaia trai kaiki kan warkka ba alki takaskaia dukyara. Bara las kat waihla nani, Pirsia ra king raya bara wih, yaban lâ raya kum mangkan warkka dauki kan ba alki takaskaia dukyara.

Israel uplika nani Babilun wina kli taui wan ba wina, pat 17 mani alkan kan. Sakuna Gâd mita ai prapitka Hagai bara Sakaraia ra blikan upla nani ra wibia warkka ba kli paski ta krikbia. Upla nani ba Gâd helpka ra kasak luki bila wali, kli paski bangwan.

Baku ba mita, suldiarka lalka kum nina Tatinai kan ba bal, Israel uplika ra ya mita tempel ba paskaia adarka yaban sapa makabi walan. Israel uplika nani bila, Babilun kingka Sairus mita ai win: ‘Jerusalem ra wih Gâdkam Jehova tempelka ba paski bangws.’

Tatinai ba rait sapa makabi walaia dukyara, Babilun ra wauhtaya kum blikan, baha pyua ra Sairus ba pat pruan kan. Wihka apia kan bara Pirsia ra king raya kum kan ba mita wauhtaya kum ulbi blikan. Baha ra ulban, Sairus ba rait baku aisan kan ba. Baha mita king ba ulban: ‘Swis Israel uplika nani ba ai Gâdka tempelka ba paskbia. Bara adar maikisna witin nani ra help munma.’ Mani walhwal bilara tempelka ba paski dan daukan kan, bara Israel uplika nani ba uba lilia bangwi kan.

Tempelka ba paski dan daukan wina, 48 mani luan kan. Jerusalem ra upla nani ba umpira kan, taun bara Gâd tempelka ba sin saura pali kaiki kan. Babilun kat Isra, Israel wina ba, walan Gâd tempelka painkira daukaia nit kan ba. Baha mita, nu sma witin dia daukan?

Witin ba Pirsia kingka Artaserksis ra wan, bara naha king pain na mita Isra ra prisantka nani manas yaban Jerusalem ra brih wabia wisi. Babilun ra Israel ulplika nani bara kan bara witin help makaban, bara 6.000 baku taki, witin wal impakaisa win. Uplika nani ba silba, gul bara diara wala mana dukya nani sin ailal brihwi bangwan.

Isra ba wari taki kan, kan yabal ra upla saura nani ailal bara kan. Naha uplika nani ba witin nani ra iki silba bara gul nani bri kan ba brihwaia sip kan. Baha mita, man lilka ra kaikisma ba baku, Isra mita upla nani ra asla daukan. Bara witin Jehova ra ai pura suni makaban, yabal wihkakku Jerusalem ra impakai ba ra kan kahbia dukyara.

Jehova witin nani ra kan kahban. Bara kati walhwal impaki bangwan ningkara, Jerusalem ra wan. Naha wan marikras sa ki, ya Jehova ra kasak luki nani ba witin mita kaina kahbaia sip ba?

Isra sapta 2 wina 8 kat.