NDUNTHI yä mꞌo nuꞌu̱ yä israelita bi bo̱ni de Babilonia pa bi mengi ha Jerusalen. Bi ñꞌo ndunthi, pe mi zo̱ni bi dini Jerusalen xki ño̱tꞌe ꞌne mi huitꞌätho. Hänge yä israelita pe̱ꞌtsi te xä hyoki mä rꞌayꞌo näꞌä hnini.

Yä israelita bi mu̱di bi hyoki nꞌa altar pa ja xä hyokini yä ofrenda de gä zuꞌue pa Jeoba. Mi thogi rꞌa yä zänä, yä israelita bi mu̱di bi hyoki rä templo Äjuä. Pe nuꞌu̱ yä nkontra mi ꞌmu̱i ha nuꞌu̱ yä hnini mi ja getbu̱, mi pidi yä israelita pa hinxä sigi xä mpe̱fi. ꞌNepu̱ nuꞌu̱ yä nduxte jäꞌi bi yꞌapäbi näꞌä rꞌayꞌo ndä de Persia ge xä mända xä ꞌmaꞌmi nuꞌu̱ yä ꞌme̱fi yä israelita.

Ya xki thogi 17 yä je̱ya dende nuꞌmu̱ yä israelita bi bo̱ni de Babilonia, Äjuä bi me̱hni nuꞌu̱ yä mꞌe̱hni mi yä thuhu Ajeo ꞌne Sakarias pa bi xipi yä jäꞌi ge xä mu̱di xä mpe̱fi mänꞌaki. Yä israelita mi pädi ge Äjuä ma xä matsꞌi hänge bi mu̱di bi mpe̱fi mänꞌaki mäske xki mhändabi ge hinxä mpe̱fi.

Nubye̱, nꞌa ndä mi rä thuhu Tatenai bi ma bä ambäbi yä israelita toꞌo xki umbäbi nse̱ki pa xä hyoki näꞌä templo. Yä israelita bi mää ge nuꞌmu̱ Siro mi mända ha Babilonia bi ꞌñembäbi: “Pengihu̱ ha Jerusalen ꞌne guä hokihu̱ rä templo Jeoba, näꞌä ri Zi Dadahu̱”.

Hänge Tatenai bi me̱hni nꞌa karta pa Babilonia habu̱ bi ñꞌani mu̱ xa mäjuäni ge ndu Siro xki uni nse̱ki. Näꞌä rꞌayꞌo ndä de Persia nguntꞌä bi yꞌofo nꞌa karta ꞌne bi mää ge Siro hää xki uni nse̱ki. ꞌNehe ha näꞌä karta bi ꞌñenä: “Hyopäbihu̱ nuꞌu̱ yä israelita dä hyokuäbi rä templo näꞌä rä Zi Dada. ꞌNe di mändaꞌihu̱ ge gi faxu̱”. Ngu goho nje̱ya mꞌe̱fa, bi uadi bi thoki näꞌä templo, ꞌne yä israelita xa bi johya.

Ya xki thogi ngu 48 yä je̱ya dende nuꞌmu̱ bi uadi bi thoki rä templo. Nubye̱ yä israelita mi hyoya, rä hnini Jerusalen ꞌne rä templo Äjuä tobe himi nheki xä ñho. Ha Babilonia, nꞌa rä israelita mi rä thuhu Esdras bi yꞌo̱de ge mi ja mꞌe̱di xä thoki xä ñho rä templo Äjuä. Hänge, ¿gi pädi te bi me̱fi?

Esdras bi ma bä nuu näꞌä ndä de Persia mi rä thuhu Artajerjes, nuni ndä bi umbi Esdras ndunthi yä hogä tꞌo̱tꞌe pa bi hñätsꞌi ha Jerusalen. Esdras bi ꞌñembi nuꞌu̱ yä israelita mi ꞌmu̱i ha Babilonia ge xä matsꞌi. Ngu 6,000 yä israelita nuꞌu̱ bi matsꞌi Esdras pa bi hñätsꞌi ndunthi yä plata, yä oro ꞌne märꞌa yä hogä tꞌo̱tꞌe pa Jerusalen.

Esdras xa mi turämu̱i ngeꞌä mi ja yä nduxte ñꞌo̱ho̱ ha rä ꞌñuu. Mi tsu ge nuꞌu̱ yä be xä hñämbäbi nuꞌu̱ yä oro, yä plata ꞌne xä hyo. Hänge ja ngu gi handi ha rä kꞌoi, Esdras bi muntsꞌi yä jäꞌi, bi xatuäbi Jeoba ꞌne bi yꞌapäbi ge xä su pa xä zo̱ni xä ñho ha Jerusalen.

Jeoba hää bi su nuꞌu̱ yä israelita. Mꞌe̱fa de goho nzänä bi zo̱ni ha Jerusalen. ¿Gi da ngue̱nda ge Jeoba di su nuꞌu̱ toꞌo di kamfribi?