KASI 50.000 hende a hasi e biahe largu for di Babilonia pa Yerusalèm. Pero ora nan a yega, Yerusalèm tabata un monton di ruina. Ningun hende tabata biba ei. E israelitanan tabatin ku traha tur kos di nobo.

Un di e promé kosnan ku nan a traha ta un altar. Esei ta un lugá pa ofresé sakrifisio di animal, òf ofrenda, na Yehova. Poko luna despues e israelitanan a kuminsá traha e tèmpel. Pero algun enemigu ku tabata biba eibanda no tabata ke pa e israelitanan trah’é. P’esei nan a purba spanta nan pa nan stòp. Finalmente e enemigunan a konvensé e rei nobo di Persia pa saka un lei pa para e trabou di konstrukshon.

Añanan a pasa. A pasa 17 aña kaba desde ku e israelitanan a bolbe for di Babilonia. Yehova a manda su profetanan Hageo i Zakarias bisa e pueblo pa kuminsá traha atrobe. E pueblo a konfia den e ayudo di Dios, i nan a obedesé e profetanan. Nan a kuminsá traha atrobe, ounke e lei a prohibí esei.

P’esei un ofisial di Persia yamá Tatnai a bin i a puntra e israelitanan ku ken su pèrmit nan tabata traha e tèmpel. E israelitanan a bis’é ku ora nan tabata na Babilonia, Rei Siro a bisa nan: ‘Awor, bai Yerusalèm i traha e tèmpel di Yehova boso Dios.’

Tatnai a manda un karta Babilonia i a puntra si Siro, ku entre tantu a muri, en bèrdat a bisa esei. Pronto a bin un karta di e rei nobo di Persia. El a bisa ku Siro realmente a bisa esei. I p’esei e rei a skirbi: ‘Laga e israelitanan traha e tèmpel di nan Dios. I mi ta duna boso òrdu pa boso yuda nan.’ Den mas o ménos kuater aña nan a kaba e tèmpel, i e israelitanan a keda masha felis.

Hopi aña mas a pasa. Awor ta kasi 48 aña desde ku nan a kaba e tèmpel. E hendenan di Yerusalèm ta pober, i e stat i e tèmpel di Dios no ta masha bunita. Leu ayá den Babilonia, e israelita Esdras a tende di e nesesidat di drecha e tèmpel di Dios. P’esei, bo sa kiko el a hasi?

Esdras a bishitá Artaherhes, rei di Persia, i e bon rei aki a duna Esdras hopi regalo pa hiba Yerusalèm. Esdras a pidi e israelitanan na Babilonia pa yud’é hiba tur e regalonan Yerusalèm. Rònt di 6.000 hende a kompañ’é. Nan tabatin hopi kos presioso pa nan hiba.

Esdras tabata preokupá pasobra tabatin atrakadó riba kaminda. E atrakadónan lo por a kita nan plata i oro for di nan i mata nan. P’esei Esdras a reuní e pueblo, manera bo ta mira riba e plachi. Anto nan a pidi Yehova pa protehá nan riba e kaminda largu di regreso pa Yerusalèm.

Yehova a protehá nan tambe. Despues di kuater luna di biahe, nan a yega bon. Esei no ta mustra ku Yehova por protehá hende ku ta konfia den dje?

Esdras kapítulo 2 te ku 8.