KLOSAP 50,000 pipol nao lusim Babylon and wakabaot go bak long Jerusalem. Bat taem olketa kasem long there, evri samting nogud nao. No eniwan stap long there. Olketa Israelite mas wakem evri samting moa.

Wanfala first samting wea olketa wakem hem wanfala altar. Diswan hem ples wea olketa savve givim olketa animal olsem sakrifaes, or present, long Jehovah. Tu-thri month bihaen, olketa Israelite start for buildim temple. Bat olketa enemy wea stap klosap no wantem olketa Israelite for buildim datwan. So olketa trae for mekem olketa fraet for stopem olketa. Gogo, olketa enemy hia mekem niufala king bilong Persia for mekem wanfala law for stopem datfala waka.

Plande year go pas. Seventin year bihaen taem olketa kasem bak long Jerusalem, Jehovah sendem tufala profet bilong hem Hagʹgai and Zech·a·riʹah for talem olketa pipol for startim datfala building waka. Olketa pipol trustim help bilong God, and olketa obeyim olketa profet. Olketa start for build moa, nomata wanfala law sei olketa mas no duim datwan.

So wanfala bigman bilong Persia, Tatʹte·nai, kam and askem olketa Israelite hu nao talem olketa for buildim temple. Olketa Israelite talem hem hao taem olketa stap long Babylon, King Cyʹrus sei long olketa: ‘Go long Jerusalem and buildim temple bilong God bilong iufala, Jehovah.’

Tatʹte·nai sendem wanfala leta go long Babylon and askem sapos Cyʹrus, wea dae finis, hem really talem datwan. No longtaem bihaen, wanfala leta from niufala king bilong Persia hem kam bak. Leta hia sei Cyʹrus hem barava talem datfala toktok. So king hem raet olsem: ‘Letem olketa Israelite buildim temple bilong God bilong olketa. And mi komandim iu for helpem olketa.’ Insaed long fofala year, temple hem finis and olketa Israelite hapi fogud.

Plande year moa go pas. Klosap 48 year bihaen olketa buildim finis datfala temple, pipol long Jerusalem olketa poor, and datfala taon and temple bilong God no mas luk gud. Long Babylon, wanfala Israelite, Ezʹra, hem herem need for fixim temple bilong God. So, waswe, iu savve wanem nao hem duim?

Ezʹra go for lukim Ar·ta·xerxʹes, king bilong Persia, and disfala gud king givim Ezʹra plande present for tekem go long Jerusalem. Ezʹra askem olketa Israelite long Babylon for helpem hem karem olketa present hia long Jerusalem. Samting olsem 6,000 pipol sei olketa bae go. Olketa garem plande silver and gold and nara samting wea kost tumas for tekem witim olketa.

Ezʹra hem wari, from plande nogud man stap long road wea olketa bae followim. Olketa man hia maet tekem silver and gold bilong olketa, and killim olketa dae tu. So Ezʹra hipimap olketa pipol, olsem iu savve lukim long piksa. Then olketa prea long Jehovah for protectim olketa long longfala wakabaot bilong olketa for go bak long Jerusalem.

Jehovah hem protectim olketa. And bihaen olketa wakabaot for fofala month, olketa kasem Jerusalem. Diswan showimaot hao Jehovah savve protectim olketa wea trustim hem for helpem olketa.