FURU dusun sma e waka a langa pasi fu Babilon go na Yerusalem. Ma te den doro, dan Yerusalem de soso wan brokobroko presi. Nowan sma e libi drape. Den Israelsma musu bow ala sani nyun baka.

Wan fu den fosi sani di den e bow, na wan altari. Disi na wan presi pe den kan tyari meti ofrandi noso presenti gi Yehovah. Wan tu mun na baka, dan den Israelsma e bigin bow a tempel. Ma feanti di e libi na den kondre di de krosibei, no wani dati. Fu dati ede den e pruberi fu tapu skreki gi den fu den tapu nanga a bow-wroko. Te fu kaba, dan den feanti disi e kisi a nyun kownu fu Persia so fara, taki a e meki wan wet di e tapu a bow-wroko.

Yari e pasa. Now a de 17 yari sensi den Israelsma ben komoto na Babilon. Yehovah e seni en profeiti Hagai nanga Sakaria fu taigi a pipel fu bigin bow baka. A pipel e frutrow tapu a yepi fu Gado èn den e gi yesi na den profeiti. Den e bigin bow baka, aladi wan wet e taki dati den no mag du dati.

Dati meki wan tiriman fu Persia, Tatnai, e kon aksi den Israelsma sortu reti den abi fu bow a tempel. Den Israelsma e fruteri en taki Kownu Sirus ben taigi den di den ben de na Babilon: ’Go now na Yerusalem èn bow a tempel fu Yehovah, un Gado.’

Tatnai e seni wan brifi go na Babilon èn e aksi efu Sirus, di ben dede kaba, ben taki disi trutru. Heri esi wan brifi e kon baka fu a nyun kownu fu Persia. Na ini a brifi tanapu taki Sirus ben taki disi trutru. Fu dati ede a kownu e skrifi: ’Meki den Israelsma bow a tempel fu den Gado. Èn mi e gi komando fu un yepi den.’ Na ini sowan fo yari a tempel e kon klari èn den Israelsma e prisiri tumusi.

Agen furu yari e pasa. A de now pikinmoro 48 yari sensi a tempel ben kon klari. A pipel na Yerusalem pôti èn a foto nanga a tempel fu Gado no luku tumusi moi. Drape na Babilon, na Israelman Esra e yere fu a fanowdu di de fu sreka a tempel fu Gado kon nyun baka. Yu sabi san a e du fu dati ede?

Esra e go na Artakserkses, a kownu fu Persia, èn a bun kownu disi e gi Esra furu presenti fu tyari go na Yerusalem. Esra e aksi den Israelsma na Babilon fu yepi en fu tyari den presenti disi go na Yerusalem. Sowan 6000 sma e taki dati den wani go nanga Esra. Den abi wan lo solfru, gowtu, nanga diri sani fu tyari gowe nanga den.

Esra e broko en ede, bika ogri sma de na a pasi. Den sma disi ben sa kan teki a solfru nanga gowtu puru na den anu èn kiri den. Fu dati ede Esra e kari a pipel kon makandra, soleki fa yu e si na tapu a prenki. Dan den e begi Yehovah fu kibri den na tapu a langa pasi go na Yerusalem.

Yehovah e kibri den tu. Baka fo mun den e doro bun na Yerusalem. Disi no e meki wi si taki Yehovah kan kibri den sma di e frutrow tapu en fu kisi yepi?